minn Dr Qasim Chaudhry, il-Viċi President tal-Kumitat Xjentifiku dwar is-Sikurezza tal-Konsumatur u l-President tal-Grupp ta’ Ħidma dwar in-nanomaterjali fil-prodotti kożmetiċi

Dan l-aħħar il-Kummissjoni Ewropea talbet lill-Kumitat Xjentifiku tagħha dwar is-Sikurezza tal-Konsumatur (SCCS) biex jipprovdi Opinjoni dwar is-sikurezza tan-nanomaterjali tas-Silika, is-Silika Idratata, u ta' silikas tas-superfiċe modifikati bħas-Silika Silylate u s-Silika Dimethyl Silylate. Dawn in-nanomaterjali jintużaw fi prodotti kożmetiċi, li jitħallew jew jitlaħalħu, għax-xagħar, il-ġilda, ix-xufftejn, il-wiċċ, u d-dwiefer.

Il-Kummissjoni tirreferi għall-SCCS kull meta jkun hemm tħassib dwar riskji għas-saħħa u riskju ta' sikurezza rigward prodotti tal-konsumatur li mhumiex tal-ikel, inklużi prodotti kożmetiċi u l-ingredjenti tagħhom. Kwalunkwe użu ta’ nanomaterjali fi prodotti kożmetiċi hu regolat fl-UE, u l-kumpaniji kożmetiċi kollha huma meħtieġa li jinnotifikaw lill-Kummissjoni sitt xhur qabel ma jkun ikkummerċjalizzat kwalunkwe prodott li jkun fih in-nanomaterjali.

Il-Kummissjoni tista’ titlob l-SCCS biex jipprovdi valutazzjoni tar-riskju meta tkun irċeviet notifiki dwar ingredjent partikulari li jqajjem preokkupazzjonijiet dwar effetti potenzjali għas-saħħa li għalihom għadha ma saritx evalwazzjoni adegwata tar-riskju. 

Dan kien tassew il-każ hawnhekk – b'kollox 172 notifika ġew riċevuti għal prodotti li kellhom wieħed jew aktar mill-erba’ tipi ta’ silika f’nanoforma. 

Skont il-mandat tiegħu, l-SCCS eżamina d-dejta sottomessa kemm mill-kumpaniji kif ukoll minn studji xjentifiċi rilevanti mmexxija mill-pari ppubblikati bil-lingwa Ingliża. Fl-aħħar ta' din l-eżaminazzjoni bir-reqqa, f’Marzu 2015 l-SCCS ikkonkluda fl-opinjoni ppubblikata tiegħu fuq l-internet li ma hemm ebda evidenza li s-silika f’nanoforma tippenetra l-ġilda jew li hi tossika, iżda, b’mod ugwalment importanti, li ma kienx hemm biżżejjed evidenza pprovduta li wieħed jista' joqgħod fuqha b'mod affidabbli biex jiġu esklużi dawn il-possibbiltajiet.  

Hemm bżonn ta’ dejta aktar speċifika għan-nano, partikularment dwar il-penetrazzjoni dermali tat-tipi differenti tan-nanosilika intenzjonati għal użu fi prodotti kożmetiċi, speċjalment fi qtugħ jew f'ġilda bil-ħsara, u dwar il-potenzjal ta’ tossiċità sistemika tagħha qabel ma dawn il-prodotti jistgħu jiġu kkunsidrati sikuri jew mhux sikuri. 

Barra minn hekk, ċerti studji fuq tip differenti ta’ nanosilika mhux użat fil-kożmetiċi jindikaw effett ġenotossiku potenzjali, għalhekk hemm bżonn ta’ aktar riċerka sabiex titneħħa l-possibbiltà li t-tipi ta' nanosilika użati fi prodotti kożmetiċi ma jkollhomx l-istess effett jekk meħuda miċ-ċelluli.

Il-konsumaturi jistgħu jserrħu moħħhom li l-Kummissjoni Ewropea hi viġilanti dwar il-ħarsien tas-saħħa tagħhom u li hi żżomm ruħha aġġornata dwar kwalunkwe żviluppi ġodda fl-użu tal-ingredjenti kimiċi jew ta' nanomaterjali fi prodotti għall-konsumaturi. Hekk kif toħroġ evidenza ġdida, l-SCCS se jerġa’ jeżamina s-sikurezza tas-silika tan-nanoforma u jippubblika l-Opinjoni tiegħu.

http://ec.europa.eu/dgs/health_food-safety/dyna/enews/enews.cfm?al_id=1594

Fid-dawl ta’ informazzjoni ġdida disponibbli, il-Kummissjoni Ewropea talbet lill-Kumitat Xjentifiku dwar ir-Riskji Emerġenti għas-Saħħa u Dawk Identifikati Reċentement (SCENIHR) għal appdejt dwar l-Opinjonijiet preċedenti li jikkonċernaw l-esponiment għall-kampi elettromanjetiċi (EMF).

L-EMF hu suġġett li jinteressa u jippreokkupa n-nies, billi lkoll li aħna ninsabu esposti għalih fil-ħajja ta' kuljum, b'xi ftit jew wisq skont l-istil ta' ħajjitna u fejn ngħixu u naħdmu, u skont il-varjetà ta' frekwenzi. Dawn il-frekwenzi jvarjaw minn estremament baxxi (p.e. minn linji tad-dawl u transformers ta’ qawwa elettrika) għal intermedji (minn uċuħ tal-kukers tal-induzzjoni u appliances domestiċi oħrajn) għall-firxa tal-frekwenza tar-radju (minn telefowns ċellulari u tagħmir ieħor). 

L-Istudji l-aktar importanti dwar l-esponiment għall-EMF u s-saħħa ppubblikati wara l-aħħar Opinjoni (2009) ġew analizzati b’mod kritiku mill-esperti u b'kummenti dwarhom fl-Opinjoni ġdida “L-effetti potenzjali fuq is-saħħa ta’ esponiment ta' kampi elettromanjetiċi (EMF)”, ippubblikata fis-27 ta’ Jannar 2015. Il-letteratura xjentifika analizzata tinkludi aktar minn 700 studju mill-2009 ’l hawn. B’mod ġenerali, il-konklużjonijiet tagħha huma ta’ serħan il-moħħ: ir-riżultati ta’ riċerka xjentifika attwali juru li ma jeżistu ebda effetti evidenti kuntrarji fuq is-saħħa jekk l-esponiment jibqa’ taħt il-livelli rakkomandati mil-leġiżlazzjoni tal-UE.

Madankollu, fir-rigward tal-firxa ta’ frekwenza intermedja, sors importanti ta’ esponiment hu l-uċuħ tal-kukers tal-induzzjoni, li saru popolari f’dawn l-aħħar snin. Dawn jistgħu jesponu l-utenti tagħhom għal kampi manjetiċi ogħla minn livelli ta’ referenza tal-linji gwida ta’ esponiment.

B’referenza għal firxa ta’ frekwenzi tar-radju u r-riskju tal-kanser, l-opinjoni tgħid li l-provi fuq iż-żieda ta’ riskju ta’ kanser tal-moħħ (glioma) saret aktar dgħajfa, filwaqt li l-possibilità ta’ assoċjazzjoni mal-kanser tal-widna (newroma akustika) teħtieġ aktar investigazzjoni. Studji dwar il-kanser tat-tfal b’rabta mal-esponiment minn trażmettituri tax-xandir ma indikaw ebda assoċjazzjoni.

Xi studji epidemjoloġiċi jissuġġerixxu żieda fir-riskju tal-lewkimja fit-tfal b’esponiment għal kampi estremament baxxi. Madankollu, ebda mekkaniżmu ma ġie identifikat u ebda appoġġ minn studji sperimentali ma jistgħu jispjegaw dawn is-sejbiet, li, flimkien man-nuqqasijiet tal-istudji epidemjoloġiċi ma jħallux li ssir interpretazzjoni kawżali.

Studji ġodda ma sabux effetti kuntrarji għas-saħħa fuq ir-riproduzzjoni jew kwalunkwe sintomi assoċjati mal-esponiment għall-kampijiet elettromanjetiċi (EMF). Studji reċenti ma kkonfermawx li l-assoċjazzjoni ssuġġerita preċedentement bejn l-EMF u ż-żieda fir-riskju tal-Alzheimer.

Minkejja dan, għad hemm xi preokkupazzjonijiet, b’mod partikulari dwar esponiment akkumulat minn sorsi kkumbinati.  SCENIHR żviluppa sett ta’ rakkomandazzjonijiet prijoritarji għar-riċerka u gwida metodoloġika dwar id-disinn sperimentali u r-rekwiżiti minimi li jiżguraw il-kwalità tad-dejta u l-kapaċità ta' użu għall-valutazzjoni tar-riskju, li jinsabu wkoll f’din l-Opinjoni.

http://ec.europa.eu/dgs/health_food-safety/dyna/enews/enews.cfm?al_id=1581

Il-bisfenol A (BPA) hi użata bħala plastifikant, dan ifisser li hi użata fil-prodotti tal-plastik biex tagħmilhom aktar flessibbli. In-nies huma esposti ferm għall-BPA, primarjament permezz tal-imballaġġ tal-ikel, u l-livell ta’ dan l-esponiment u l-effetti possibbli tiegħu huma ġeneralment diskussi fil-komunità xjentifika.

Il-BPA tintuża wkoll f’tagħmir mediku bħall-kateters u l-impjanti, u f’xi tagħmir dentali, u l-Kumitat Xjentifiku dwar ir-Riskji Emerġenti għas-Saħħa u Dawk Identifikati Reċentement (SCENIHR) intalab mill-Kummissjoni Ewropea biex jeżamina kwalunkwe riskju li jista’ jkun hemm għas-saħħa assoċjat ma’ dan it-tip ta’ użu.

Fil-biċċa l-kbira ta’ dawn l-applikazzjonijiet, inklużi fid-dentistrija, l-ammont ta’ BPA li n-nies huma esposti għalih hu meqjus li ma joħloqx effetti kuntarji peress li ma jaqbiżx il-limitu tad-doża tollerabbli ta’ kuljum ta’ 4 μg għal kull kg ta’ piż tal-ġisem għal kull ġurnata. Barra minn hekk, l-esponiment għall-BPA permezz ta’ tagħmir mediku hu normalment għal perjodu ta’ żmien qasir biss, filwaqt li doża tollerabbli ta’ kuljum tassumi esponiment kontinwu ta’ kuljum tul il-ħajja.

L-ogħla esponiment stmat għall-BPA iseħħ matul proċeduri mediċi fit-tul, speċjalment għal neonati f’unitajiet ta’ kura intensiva, għal trabi li jkunu għaddejjin minn proċeduri mediċi fit-tul u għal pazjenti tad-dijaliżi. Abbażi tad-dejta disponibbli, SCENIHR jikkonkludi li r-riskju ta’ effetti kuntrarji minn BPA jista' jeżisti f’każijiet bħal dawn, peress li l-esponiment jaqbeż il-valur ta’ referenza u l-popolazzjoni esposta tista' tkun partikularment vulnerabbli.  

Il-benefiċċju ta’ tagħmir mediku għandu jiġi kkunsidrat ukoll: p.e. is-sopravivenza ta’ trabi prematuri sikwit tiddependi minnu. Il-possibbiltà li tiġi sostitwita l-BPA f’dawn il-prodotti għandha tiġi kkunsidrata skont l-effiċjenza tagħhom fit-trattament, kif ukoll il-profil tossikoloġiku ta’ materjali alternattivi, meta disponibbli.

http://ec.europa.eu/dgs/health_food-safety/dyna/enews/enews.cfm?al_id=1580

Bi tweġiba għal talba mill-Kummissjoni Ewropea għal Opinjoni aġġornata dwar l-amalgama dentali, il-Kumitat Xjentifiku indipendenti dwar ir-Riskji Emerġenti għas-Saħħa u Dawk Identifikati Reċentement (SCENIHR) dan l-aħħar ippubblika “Is-sikurezza tal-amalgama dentali u tal-materjali alternattivi ta’ restorazzjoni dentali għal pazjenti u utenti”.

Amalgama dentali hi mili "bil-fidda", magħmul minn liga ta’ metalli inkluż merkurju elementali, u kien hemm preokkupazzjonijiet dwar riskji ta’ saħħa assoċjati mal-fwar tal-merkurju li tipproduċi.

Dawn il-problemi, madankollu, ma ġewx sostanzjati permezz ta’ studji xjentifiċi korrenti. Wara li eżamina l-evidenza xjentifika attwali, SCENIHR sab li la l-amalgama dentali u lanqas il-materjali alternattivi mhuma ta’ ħsara għas-saħħa tal-popolazzjoni inġenerali f’ċirkustanzi ta’ użu normali.

Waqt li mili alternattiv jibqa’ għażla vijabbli għal mili ġdid, mhuwiex rakkomandat li tinbidel l-amalgama dentali b’alternattivi sakemm il-pazjent ma weriex reazzjoni allerġika għaliha għax it-tneħħija tal-amalgama tal-merkurju tesponi lill-pazjent għal aktar merkurju meta titneħħa milli meta titħalla fejn hi. 

Meta jagħżlu liema materjal għandu jintuża, il-pazjenti u d-dentisti tagħhom jeħtiġilhom iħarsu lejn fatturi fosthom jekk il-mili hux għal snien primarji jew permanenti, liema sinna maħsub għaliha l-mili, u jekk il-pazjent għandux kwalunkwe allerġija għal merkurju jew għal komponenti oħrajn tal-materjali restorattivi.  Bħal fil-każ ta’ kwalunkwe intervent mediku jew farmaċewtiku ieħor, prekawzjoni għandha tkun eżerċitata meta jiġi kkunsidrat it-tqegħid ta’ kwalunkwe materjal restorattiv dentali f’nisa tqal.

http://ec.europa.eu/dgs/health_food-safety/dyna/enews/enews.cfm?al_id=1591

Studji reċenti wrew li l-użu tal-kromju VI permezz tal-ilma tax-xorb jista’ jwassal għal tipi differenti ta’ kanser fil-kanal gastro-intestinali ta' annimali sperimentali. Bħalissa, ma jistax jiġi eskluż li l-kromju VI jista' jikkawża l-kanser fil-bniedem meta jittieħed oralment. Għal din ir-raġuni, tnaqqset id-doża bla periklu virtwali għal kromju VI. Ħafna prodotti mmanifatturati fihom il-kromju VI, inklużi xi ġugarelli tat-tfal. Id-Direttiva tal-UE dwar is-Sikurezza tal-Ġugarelli tistabbilixxi limiti stretti għall-ammont massimu ta’ kompost kimiku li jista’ jiġi trasferit minn ġugarell għat-tfal, imsejjaħ il-“limitu ta’ migrazzjoni”, dwar il-ġugarelli kollha li jinbiegħu fl-UE. 

Il-Kummissjoni Ewropea talbet il-Kumitat Xjentifiku indipendenti dwar is-Saħħa u r-Riskji Ambjentali (SCHER) tagħha biex jeżamina l-aħħar studji u biex jagħti l-opinjoni tiegħu dwar il-Kromju VI fil-Ġugarelli. Fil-konklużjonijiet tiegħu, SCHER iddikjara l-opinjoni tiegħu li l-limiti ta' migrazzjoni attwali għall-kromju VI minn ġugarelli għandu jiġi rivedut b’konformità mal-limitu massimu l-ġdid ta’ doża sikura virtwali aktar baxxa. Barra minn hekk, sabiex jitqies l-użu tal-Kromju VI minn sorsi oħra bħall-ilma tax-xorb u l-ambjent, SCHER irrakkomanda li l-esponiment għall-kromju VI addizzjonali minn ġugarelli għandu jkun ġie minimizzat għal-livell l-aktar baxx possibbli meta jintużaw l-aqwa teknoloġiji disponibbli.

http://ec.europa.eu/dgs/health_food-safety/dyna/enews/enews.cfm?al_id=1566