Flimkien għal edukazzjoni u opportunitajiet ta’ xogħol inklużivi (Verżjoni faċli li jinqara)
Il-persuni b’diżabbiltà għandu jkollhom aċċess għall-edukazzjoni. Dan ifisser li għandhom ikunu jistgħu jmorru l-iskola, jistudjaw u jieħdu sehem f’taħriġ biex jitgħallmu ħiliet ġodda.
Dan se jgħinhom ukoll biex isibu impjieg tajjeb aktar tard f’ħajjithom u jkunu parti mill-komunità.
Madankollu, ħafna persuni b’diżabbiltà fl-Ewropa m’għandhomx l-opportunità li jistudjaw jew jaħdmu bħal nies oħrajn. Fost oħrajn, dan jista’ jkun minħabba li:
- Binjiet bħall-iskejjel u l-uffiċċji mhumiex aġġustati għall-ħtiġijiet tal-persuni b’diżabbiltà.
- Persuni oħrajn jistgħu ma jkunux iridu jaħdmu ma’ persuni b’diżabbiltà.
Dan hu inġust.
Il-Kummissjoni Ewropea trid tiżgura li l-persuni b’diżabbiltà jkunu jistgħu jgawdu d-dritt tagħhom li jistudjaw u jaħdmu bħall-persuni l-oħrajn kollha.
Il-Kummissjoni Ewropea għamlet pjan ta’ ħidma għas-snin li ġejjin. Il-pjan jissejjaħ “Strateġija dwar id-drittijiet tal-persuni b’diżabbiltà 2021-2030”. Fil-qosor, aħna nsejħulha “l-Istrateġija Ewropea tad-Diżabbiltà”.
Wieħed mill-għanijiet tal-Istrateġija Ewropea tad-Diżabbiltà hu li tippromwovi d-dritt tal-persuni b’diżabbiltà li jistudjaw u jaħdmu. Fis-snin li ġejjin, il-Kummissjoni Ewropea se taħdem biex:
- Tiżgura li l-persuni b’diżabbiltà jkollhom l-istess ċans li jistudjaw u jitgħallmu ħiliet ġodda bħall-persuni l-oħrajn kollha.
- Toffri taħriġ lill-għalliema dwar il-ħtiġijiet tal-istudenti b’diżabbiltà.
- Tiżgura li t-tfal b’diżabbiltà jingħataw l-appoġġ it-tajjeb biex ikunu jistgħu jmorru l-iskola ma’ tfal oħrajn.
- Tiżgura li l-persuni b’diżabbiltà ma jiġux imċaħħdin mid-dritt li jaħdmu minħabba li għandhom diżabbiltà.
- Tiżgura li l-uffiċċji jiġu aġġustati għall-ħtiġijiet tal-persuni b’diżabbiltà sabiex ikunu jistgħu jaħdmu hemm ukoll.
- Tgħin liż-żgħażagħ b’diżabbiltà biex isibu impjieg.