Illum, il-Kummissjoni adottat proposta emendata għal “Regolament dwar l-Iffaċilitar tas-Soluzzjonijiet Transfruntieri” biex tgħin lill-Istati Membri jegħlbu l-ħafna ostakli li qed ikollhom impatt fuq il-ħajja ta' kuljum ta' 150 miljun ċittadin Ewropew li jgħixu fir-reġjuni transfruntieri tal-Ewropa.
- 12 December 2023
L-ostakli li jħabbtu wiċċhom magħhom iċ-ċittadini, in-negozji u l-amministrazzjonijiet pubbliċi f'dawn ir-reġjuni jinkludu standards tekniċi differenti jew dispożizzjonijiet amministrattivi u legali nazzjonali li ma jqisux id-dimensjoni transfruntiera. Dawn l-ostakli jista' jkollhom impatt fuq l-iżvilupp tal-infrastruttura u l-operat tas-servizzi pubbliċi transfruntieri. Ostakli ta' din ix-xorta jfixklu l-ħajja tal-komunitajiet transfruntieri, pereżempju, billi jnaqqsu l-aċċess għas-servizzi tal-kura tas-saħħa (inkluża l-emerġenza) u jillimitaw il-kapaċità tagħhom li jikkoordinaw l-isforzi ta' rispons għad-diżastri u jikkollaboraw fi proġetti infrastrutturali konġunti, fost affarijiet oħra.
L-indirizzar ta' dawn l-ostakli jtejjeb b'mod sinifikanti l-funzjonament tas-Suq Uniku tal-UE. Studju ffinanzjat mill-Kummissjoni jistima li t-tneħħija ta' 20 % tal-ostakli legali u amministrattivi attwali tagħti spinta lill-PDG ta' 2 % fir-reġjuni transfruntieri u toħloq aktar minn miljun impjieg.
Xi jfisser ir-Regolament fil-prattika
Il-Kummissjoni qed tipproponi li l-Istati Membri jistabbilixxu Punti ta' Koordinazzjoni Transfruntieri (CBCP), servizz ġdid li se jivvaluta kull talba ppreżentata mill-partijiet ikkonċernati fil-fruntieri dwar l-ostakli potenzjali, u jaġixxi bħala kollegament bejnhom u bejn l-awtoritajiet nazzjonali. Ir-Regolament jiżgura li l-partijiet ikkonċernati jirċievu tweġiba wara l-valutazzjoni ta' kull talba, bi spjega ta' kif se tiġi ttrattata.
Jekk l-ostaklu jkun fil-fatt jeżisti u jekk ma jkun hemm l-ebda ftehim ta' kooperazzjoni bilaterali jew internazzjonali fis-seħħ li jkun jista' jintuża biex tiġi implimentata soluzzjoni, l-Istati Membri jistgħu mbagħad japplikaw l-Għodda għall-Faċilitazzjoni Transfruntiera, proċedura standard volontarja mfassla biex tegħleb l-ostakli amministrattivi u legali fir-reġjuni transfruntieri. Filwaqt li kull talba trid tiġi mwieġba, id-deċiżjoni dwar jekk għandux jingħeleb ostaklu tibqa' l-prerogattiva tal-awtoritajiet nazzjonali kompetenti.
Ir-Regolament jipproponi wkoll il-ħolqien ta' network ta' CBCPs flimkien mal-Kummissjoni, biex jinħoloq forum għall-iskambju tal-aħjar prattiki u l-kondiviżjoni tal-għarfien.
Sfond
F'Mejju 2018, il-Kummissjoni pproponiet regolament dwar mekkaniżmu sabiex jingħelbu l-ostakli legali u amministrattivi f'kuntest transfruntier (il-proposta dwar l-ECBM). Madankollu, ma ntlaħaq l-ebda qbil bejn il-Parlament u l-Kunsill dwar il-fajl. F'Settembru 2023, il-Parlament adotta riżoluzzjoni leġiżlattiva fuq inizjattiva proprja, b'rakkomandazzjonijiet lill-Kummissjoni bl-għan li jingħeleb l-istaġnar dwar il-proposta tal-ECBM. Bir-Regolament il-ġdid dwar “L-iffaċilitar ta' Soluzzjonijiet Transfruntieri”, il-Kummissjoni qed temenda l-proposta tagħha tal-2018 billi tqis kif xieraq it-tħassib u r-rakkomandazzjonijiet magħmula miż-żewġ koleġiżlaturi, filwaqt li żżomm il-fokus oriġinali tagħha li tegħleb l-ostakli li jxekklu l-ħajja tal-komunitajiet transfruntieri. Il-proposta tal-Kummissjoni issa se tiġi nnegozjata mal-Parlament u mal-Kunsill.
Il-proposta tikkomplementa għadd ta' inizjattivi tal-Kummissjoni b'appoġġ għar-reġjuni tal-fruntiera, bħall-“b-solutions”, li ġiet varata fl-2018 biex tipprovdi appoġġ legali lill-awtoritajiet pubbliċi biex jidentifikaw il-kawżi ewlenin tal-ostakli legali u amministrattivi u biex jesploraw is-soluzzjonijiet possibbli. L-għarfien miksub minn aktar minn 150 każ identifikat wera li għodda legali Ewropea, bħal dik li qed tiġi proposta llum, tgħin biex jissolvew aktar minn terz tal-każijiet.
Fl-2021, il-Kummissjoni ppubblikat ukoll rapport dwar “Reġjuni mal-Fruntieri tal-UE - Laboratorji Ħajjin tal-Integrazzjoni Ewropea,” li juri l-effetti pożittivi – kemm għar-reġjuni tal-fruntiera kif ukoll għall-Unjoni kollha kemm hi – tal-indirizzar tal-ostakli transfruntieri. Huwa kien jinkludi wkoll riflessjoni dwar xi wħud mit-tagħlimiet meħuda mill-pandemija tal-COVID-19, u l-ostakli transfruntieri li rriżultaw minħabba r-restrizzjonijiet imposti.
Illum, il-Kummissjoni Ewropea qed tieħu pass ieħor biex tneħħi aktar mill-ostakli li ilhom jeżistu għas-suq uniku tal-UE. Il-ħafna reġjuni transfruntieri tagħna għadhom iħabbtu wiċċhom ma’ ostakli legali u amministrattivi li mhux biss irażżnu l-attività kummerċjali u l-prestazzjoni ekonomika iżda jfixklu wkoll l-isforzi ta’ għajnuna transfruntiera – bħall-ġlieda kontra n-nirien fil-foresti u l-għoti ta’ assistenza medika ta’ emerġenza. Il-proposta tagħna għandha l-għan li tippromwovi kooperazzjoni bla xkiel bejn in-nies, l-awtoritajiet pubbliċi, u n-negozji f’dawn ir-reġjuni vitali, kif ukoll li tisfrutta l-potenzjal tagħhom li jistimulaw aktar tkabbir u prosperità biex ikompli jissaħħaħ is-suq uniku.
Valdis Dombrovskis, il-Viċi President Eżekuttiv għal Ekonomija għas-Servizz tan-Nies - 12/12/2023
Anke 30 sena wara t-twaqqif tas-Suq Uniku, għad hemm ħafna ostakli transfruntieri li qed iżommu lura r-reġjuni fil-fruntiera milli jaħsdu l-benefiċċji sħaħ tal-integrazzjoni tal-UE. Bil-proposta għall-iffaċilitar ta’ soluzzjonijiet transfruntieri, qed nipproponu għodda flessibbli u ħafifa lill-awtoritajiet nazzjonali biex ineħħu dawn l-ostakli. In-nies li jgħixu fir-reġjuni tal-fruntiera jagħmlu terz tal-popolazzjoni tal-UE; il-proposta tal-lum tirrappreżenta l-possibbiltà ta’ titjib konkret fil-ħajja tagħhom ta’ kuljum.
Elisa Ferreira, il-Kummissarju għall-Koeżjoni u r-Riformi - 12/12/2023
Aktar informazzjoni
- Ir-Regolament dwar l-Iffaċilitar ta' Soluzzjonijiet Transfruntieri
- Il-Proposta tal-2018 għal Mekkaniżmu Transfruntier Ewropew
- Ir-Rapport dwar ir-Reġjuni mal-Fruntieri tal-UE: Laboratorji ħajjin tal-integrazzjoni Ewropea
- Ir-Rapport dwar il-Kwantifikazzjoni tal-effetti tal-ostakli legali u amministrattivi fil-fruntieri fir-reġjuni bi fruntieri fuq l-art