Flimkien għal parteċipazzjoni
Li tivvota fl-elezzjonijiet ifisser li tista’ tagħżel liema nies se jirrappreżentawk u jieħdu d-deċiżjonijiet u jgħaddu l-liġijiet fl-Ewropa.
Li toħroġ għall-elezzjonijiet ifisser li titlob lin-nies jivvutawkek sabiex tkun tista’ tirrappreżentahom u tieħu d-deċiżjonijiet u tgħaddi l-liġijiet fl-Ewropa.
Id-dritt tal-vot u tal-kandidatura għall-elezzjonijiet hu importanti ħafna għan-nies kollha.
Persuni b’diżabbiltà għandu jkollhom id-dritt li jivvutaw u li joħorġu għall-elezzjonijiet ukoll.
Il-vuċi tagħhom tgħodd bħal ta’ kulħadd!
Sfortunatament, ħafna persuni b’diżabbiltà fl-Ewropa ma jistgħux jivvutaw jew joħorġu għall-elezzjonijiet bħal persuni oħrajn. Dan jista’ jkun minħabba li:
- L-elezzjonijiet mhumiex aċċessibbli għalihom. Pereżempju, jekk l-informazzjoni ma tkunx faċli biex tinqara, il-persuni b’diżabbiltà intellettwali jistgħu ma jifhmux kif jivvutaw. Jew jekk il-bini fejn isiru l-elezzjonijiet ma jkollux rampi, il-persuni f’wheelchairs għandu mnejn ma jkunux jistgħu jivvutaw.
- Ħafna persuni b’diżabbiltà ma jitħallewx jivvutaw jew jagħmlu l-għażliet tagħhom fil-ħajja.
B’dan il-mod il-persuni b’diżabbiltà jitħallew barra.
L-ilħna tagħhom ma jinstemgħux.
Il-Kummissjoni Ewropea trid tibdel dan.
Hi għamlet pjan ta’ ħidma għas-snin li ġejjin biex tagħmel l-affarijiet aħjar għall-persuni b’diżabbiltà.
Il-pjan jissejjaħ “Strateġija dwar id-drittijiet tal-persuni b’diżabbiltà 2021-2030”. Fil-qosor, aħna nsejħulha “l-Istrateġija Ewropea tad-Diżabbiltà”.
Wieħed mill-għanijiet tal-Istrateġija Ewropea tad-Diżabbiltà hu li jiġi żgurat li l-persuni b’diżabbiltà jkunu jistgħu jieħdu sehem f’elezzjonijiet bħal kulħadd.
Fost l-oħrajn, fis-snin li ġejjin, il-Kummissjoni Ewropea se:
- Taħdem mal-pajjiżi kollha tal-Unjoni Ewropea biex tiżgura li l-persuni b’diżabbiltà jkunu jistgħu jivvutaw u joħorġu għall-elezzjonijiet.
- Tixxerja eżempji tajbin ta’ elezzjonijiet aċċessibbli biex tagħti ideat dwar kif dawn jistgħu jsiru.
- Tagħmel l-informazzjoni dwar l-elezzjonijiet aċċessibbli sabiex il-persuni kollha b’diżabbiltà jkunu jistgħu jifhmu kif jistgħu jieħdu sehem.
- Tiżgura li l-elezzjonijiet jiġu aġġustati għall-ħtiġijiet tal-persuni b’diżabbiltà sabiex ikunu jistgħu jieħdu sehem bħal persuni oħrajn.