L-Ewropa tfittex li tindirizza l-“eżodu tal-ħiliet” taż-żgħażagħ minn reġjuni milquta ħażin

Minkejja t-titjib fl-edukazzjoni, bosta reġjuni tal-UE qed jiffaċċjaw għadd baxx ta’ nies tas-sengħa u tnaqqis mgħaġġel tal-popolazzjoni li taħdem hekk kif in-nies jiċċaqilqu għax-xogħol jew għal kwalità ta’ ħajja aħjar. Dan il-mudell ta’ moviment minn żona partikolari huwa magħruf bħala “eżodu tal-ħiliet”.

Bħalissa, persuna minn kull għaxra fl-UE tgħix f’reġjun li qed jiffaċċja din l-isfida. Reġjuni bi tkabbir ekonomiku aktar baxx mill-medja qed isofru l-aktar, bħaż-żoni rurali fin-Nofsinhar u l-Lvant tal-Ewropa.

F’konformità mal-għan tal-politika ta’ koeżjoni tal-UE li tnaqqas id-disparitajiet bejn ir-reġjuni, il-Kummissjoni biħsiebha żżomm u tattira t-talent lejn dawn ir-reġjuni. L-għan mhuwiex li jiġu offruti l-istess opportunitajiet kullimkien, iżda li jkun hemm adattament għall-ħtiġijiet lokali skont il-vantaġġi u d-dgħufijiet ta’ kull reġjun.

It-tħeġġiġ taż-żgħażagħ biex jibqgħu fi jew imorru f’reġjuni affettwati jista’ jgħin biex jitreġġa’ lura l-eżodu tal-ħiliet. Fi kliem il-Kummissarju għall-Koeżjoni u r-Riformi, Elisa Ferreira, huwa essenzjali li l-“enerġija taż-żgħażagħ” tinżamm ħajja fl-oqsma u l-pajjiżi fejn huma meħtieġa.

Djalogu ta’ politika

Bħala parti mis-Sena Ewropea taż-Żgħaħagħ, il-Kummissarju Ferreira stiednet parteċipanti żgħażagħ minn madwar l-Ewropa biex jiddiskutu soluzzjonijiet għall-eżodu tal-ħiliet u biex jiskambjaw ideat. Id-djalogu tal-politika sar f’Settembru u involva 13-il mexxej żagħżugħ li jirrappreżentaw korpi bħall-kunsilli nazzjonali taż-żgħażagħ u l-assoċjazzjonijiet ta’ min iħaddem.

Fil-ftuħ tad-djalogu, il-Kummissarju saħqet dwar l-importanza taż-żgħażagħ fil-ħolqien ta’ negozji, servizzi u soluzzjonijiet ġodda. Min-naħa tagħhom, il-parteċipanti enfasizzaw diversi setturi li jeħtieġu aktar appoġġ, bħall-kura tas-saħħa, is-servizzi soċjali jew is-setturi tal-enerġija li jinsabu fi tranżizzjoni lejn sorsi ekoloġiċi.

Kaja Pavlinić, Viċi President tal-bord ta’ tmexxija tan-Netwerk taż-Żgħażagħ Kroat, enfasizzat li l-ospitalità u t-turiżmu jinsabu fi kriżi f’pajjiżha. Dawn in-negozji huma muturi ewlenin tal-ekonomija u kellhom ifittxu ħaddiema żgħażagħ minn barra l-UE biex inaqqsu d-distakk fin-nuqqas ta’ ħaddiema. 

Diversi parteċipanti ssuġġerew li t-tranżizzjoni għal mudelli ekonomiċi ġodda tista’ tissalvagwardja l-ambjent tagħna u tipprovdi xbieki ta’ sikurezza soċjali għal persuni aktar vulnerabbli.

“It-tkabbir ekonomiku jista’ jkun ukoll is-sinsla ta’ wħud mill-problemi li ż-żgħażagħ qed jiffaċċjaw fl-Ewropa,” qalet María Rodríguez Alcázar, membru tal-bord tal-Forum Ewropew taż-Żgħażagħ. “It-tkabbir ta’ spiss isir għad-detriment tad-drittijiet u l-kundizzjonijiet tax-xogħol.”

L-involviment attiv taż-żgħażagħ

Il-parteċipanti u l-Kummissarju qablu lkoll li involviment aktar profond fid-demokrazija jinkoraġġixxi liż-żgħażagħ biex jibqgħu fir-reġjuni. 

Christiana Xenofontos, membru tal-bord tal-Forum Ewropew taż-Żgħażagħ, qalet: “Għandna bżonn inħossu, bħala żgħażagħ, li aħna parti integrali mis-soċjetajiet tagħna, mir-reġjuni tagħna, mill-ibliet tagħna biex nibqgħu hemm u noffru l-ħiliet tagħna.” 

Żgħażagħ Ewropej japprezzaw ħafna ambjent pożittiv u li jrawwem, b’mod partikolari wara l-kriżi tal-coronavirus. 

“Aħna lkoll qed inġorru magħna l-ġrieħi tal-pandemija, speċjalment il-ġenerazzjoni tagħna,” żiedet tgħid Xenofontos.

Huwa u jitkellem dwar pajjiżu, Jan Pałasz, membru tal-bord tal-Kunsill Pollakk taż-Żgħażagħ, qal: “Meta mqabbel ma’ sena ilu, il-perċentwal ta’ dawk li ma ddeċidewx dwar jekk joqogħdux jew imorrux jaħdmu barra minn pajjiżhom żdied b’ħames darbiet għal 15 %.”

Futur inklussiv

Il-Kummissarju Ferreira rringrazzjat lill-parteċipanti kollha talli ngħaqdu u kkontribwew. Hija rrikonoxxiet id-domanda għall-kwalità tal-ħajja u s-sentiment ta’ inklużjoni, mhux biss l-impjiegi.

Diversi strumenti u inizjattivi ffinanzjati mill-UE bħalissa jappoġġaw liż-żgħażagħ u jissalvagwardjaw ir-reġjuni kontra l-eżodu tal-ħiliet.

Waħda hija l-Bauhaus Ewropea l-Ġdida, inizjattiva interdixxiplinari li tippromwovi l-Patt Ekoloġiku.

“L-idea ta’ Bauhaus,” qalet il-Kummissarju, “hija li kull sena noffru premju liż-żgħażagħ li jtejbu l-kwalità tal-ambjent tagħhom, u huma jirċievu premju.”

Għandha l-għan li tippromwovi s-sostenibbiltà, l-inklużività u spazji attraenti u komdi fejn wieħed jgħix.

Is-sena d-dieħla se jkun hemm aktar appoġġ. Is-Sena Ewropea tal-Ħiliet fl-2023, imħabbra minn Ursula von der Leyen, il-President tal-Kummissjoni Ewropea, aktar kmieni f’Settembru, se tgħin biex tindirizza l-eżodu tal-ħiliet madwar l-Ewropa.

Waqt li l-Ewropej kollha jkomplu jgawdu mil-libertà tal-moviment, ħadd ma’ għandu jitħalla lura. L-UE kollha kemm hi għandha tibbenefika minn opportunitajiet ġodda għat-tkabbir, b’mod partikolari ż-żgħażagħ tagħna.