Fl-2021, madwar 16-il miljun ċittadin tal-UE/EFTA għexu f’pajjiż ieħor tal-UE jew tal-EFTA u saru kważi 100 miljun vjaġġ turistiku lejn Stat Membru ieħor tal-UE.

Hemm regoli ta’ koordinazzjoni tas-sigurtà soċjali li jipproteġu drittijietek għas-sigurtà soċjali meta tiċċaqlaq fl-Ewropa. Dawn ir-regoli qed jiġu modernizzati.

Id-diġitalizzazzjoni tista’ tkompli ttejjeb il-koordinazzjoni tas-sistemi tas-sigurtà soċjali u tappoġġja mobbiltà ġusta tal-forza tax-xogħol.

Din hi r-raġuni għaliex il-Kummissjoni ppreżentat Komunikazzjoni b’objettivi għad-diġitalizzazzjoni fuq terminu qasir u twil.

Għaliex id-diġitalizzazzjoni hi importanti?

L-użu ta’ aktar għodod diġitali għall-koordinazzjoni tas-sigurtà soċjali għandu ħafna vantaġġi. Pereżempju, dan:

• inaqqas il-piż amministrattiv u l-ispejjeż għall-persuni li jmorru jgħixu f’pajjiż ieħor jew imexxu negozju hemmhekk
• itejjeb il-kwalità tas-servizzi pubbliċi u jħaffef il-proċessi ta’ koordinazzjoni tas-sigurtà soċjali
• jgħin lill-istituzzjonijiet jaqsmu l-informazzjoni u jaħdmu flimkien aħjar permezz ta’ xxerjar u awtomatizzazzjoni mtejba tad-data
• jimminimizza r-riskju ta’ żbalji u frodi tas-sigurtà soċjali, inkluż l-użu ta’ dokumenti falsifikati, u b’hekk isaħħaħ il-protezzjoni tal-ħaddiema u l-mobbiltà ġusta tal-forza tax-xogħol

L-għan tad-diġitalizzazzjoni tal-koordinazzjoni tas-sigurtà soċjali jallinea wkoll mal-objettivi tal-programm ta’ politika tal-Ewropa “Deċennju Diġitali”, li għandu l-għan li jittrasforma s-servizzi pubbliċi, jippromwovi l-iskambju transfruntier tal-informazzjoni u jissimplifika l-interazzjonijiet mal-pubbliku.

Inizjattivi diġitali f’dan il-qasam

Ir-regoli tal-UE dwar il-koordinazzjoni tas-sigurtà soċjali jitolbu lill-pajjiżi jużaw it-teknoloġiji diġitali biex jaċċessaw, jipproċessaw u jiskambjaw data dwar is-sigurtà soċjali. Huma jħeġġu wkoll lill-pajjiżi biex jiżguraw li s-servizzi għan-nies li jeżerċitaw id-dritt tagħhom li jiċċaqalqu liberament fl-UE kollha jkunu faċli għall-utent.

Il-pajjiżi tal-UE u l-Kummissjoni bħalissa qed jaħdmu fuq 2 inizjattivi ewlenin f’dan il-qasam:

1. Nagħmluha aktar faċli għall-istituzzjonijiet tas-sigurtà soċjali biex jaqsmu l-informazzjoni u jaħdmu flimkien

Is-sistema ta’ Skambju Elettroniku ta’ Informazzjoni dwar is-Sigurtà Soċjali (EESSI) qed tgħin lill-istituzzjonijiet tas-sigurtà soċjali jaqsmu l-informazzjoni fl-Ewropa kollha. Dan ifisser li l-istituzzjonijiet nazzjonali jistgħu jipproċessaw it-talbiet tas-sigurtà soċjali (eż. għall-benefiċċji tal-qgħad, il-benefiċċji tal-kura tas-saħħa, il-benefiċċji tal-familja u l-pensjonijiet) aktar malajr u b’mod aktar sigur.

2. Nissimplifikaw l-interazzjonijiet bejn il-pubbliku, in-negozji, l-istituzzjonijiet tas-sigurtà soċjali u korpi pubbliċi oħrajn

Taħt l-inizjattiva Pass Ewropew tas-Sigurtà Soċjali, il-Kummissjoni nediet proġett pilota biex tesplora l-fattibbiltà tal-verifika diġitali tal-intitolamenti tas-sigurtà soċjali taċ-ċittadini bejn il-fruntieri.

Mistoqsijiet u Tweġibiet

Dan hu dak kollu li għandek bżonn tkun taf dwar id-diġitalizzazzjoni fil-koordinazzjoni tas-sigurtà soċjali.