Flimkien għal kultura, divertiment u sports inklużivi (Verżjoni faċli li jinqara)
Il-persuni b’diżabbiltà għandu jkollhom aċċess għal:
- Kultura
Pereżempju, għandhom ikunu jistgħu jżuru mużew mingħajr problemi.
- Divertiment
Pereżempju, għandhom ikunu jistgħu jgawdu l-passatempi tagħhom u jieħdu sehem fl-attivitajiet li jixtiequ.
- Sport
Pereżempju, għandhom ikunu jistgħu jieħdu sehem fi kwalunkwe sport li jogħġobhom, bħall-basketball, it-tennis jew l-għawm.
Sfortunatament, il-persuni b’diżabbiltà spiss jitħallew barra minn dawn l-attivitajiet minħabba li mhumiex aċċessibbli għalihom. Pereżempju, l-informazzjoni fil-mużewijiet tista’ ma tkunx faċli biex tinqara u għalhekk il-persuni b’diżabbiltà intellettwali jaf ma jkunux jistgħu jifhmuha.
Jew l-isport jista’ jsir f’binjiet li mhumiex aġġustati għal persuni b’diżabbiltà u għalhekk ma jkunux jistgħu jidħlu.
Il-Kummissjoni Ewropea trid tbiddel dan u tiżgura li l-persuni kollha b’diżabbiltà jkunu jistgħu jgawdu l-kultura, id-divertiment u l-isport kullimkien fl-Ewropa.
Biex tagħmel dan, il-Kummissjoni Ewropea għamlet pjan ta’ ħidma għas-snin li ġejjin.
Il-pjan jissejjaħ “Strateġija dwar id-drittijiet tal-persuni b’diżabbiltà 2021-2030”.
Fil-qosor, aħna nsejħulha “l-Istrateġija Ewropea tad-Diżabbiltà”.
Fost oħrajn, il-pjan jgħid li l-Kummissjoni Ewropea se taħdem biex:
- Tippromovi x-xogħol tal-artisti b’diżabbiltà.
- Tagħmel il-kultura, id-divertiment u l-isport aċċessibbli sabiex il-persuni b’diżabbiltà jkunu jistgħu jieħdu sehem mingħajr problemi.
- Tagħmilha possibbli għall-persuni b’diżabbiltà li jivvjaġġaw madwar l-Ewropa.
- Tiżgura li l-persuni b’diżabbiltà jiġu ppreżentati b’mod ġust u rispettuż fil-programmi tat-TV u l-films.