Illum il-Kummissjoni ppubblikat l-Indiċi tal-Kompetittività Reġjonali (RCI), verżjoni kompletament riveduta ta' għodda li issa ilha stabbilita li tkejjel dimensjonijiet differenti tal-kompetittività għar-reġjuni kollha tal-UE.
- 27 March 2023
L-RCI 2.0 rivedut bis-sħiħ juri li għad hemm differenzi kbar bejn ir-reġjuni tal-UE, iżda wkoll li r-reġjuni inqas żviluppati qed itejbu l-kompetittività tagħhom. L-indiċi juri wkoll li r-reġjuni ta' Utrecht, Zuid-Holland u r-reġjun kapitali Franċiż ta' Île-de-France huma l-aktar reġjuni kompetittivi fl-UE.
Ir-reġjuni inqas żviluppati qed inaqqsu d-distakk
Bejn l-edizzjonijiet tal-indiċi tal-2016 u tal-2022, il-kompetittività reġjonali tjiebet fir-reġjuni inqas żviluppati, filwaqt li l-prestazzjoni tar-reġjuni ta' tranżizzjoni kienet aktar imħallta. Ir-reġjuni aktar żviluppati għadhom dawk bl-aqwa prestazzjoni.
Madankollu, l-aktar valuri baxxi għadhom ikkonċentrati fir-reġjuni inqas żviluppati tal-Istati Membri tal-UE tal-Lvant.
Ir-reġjuni kollha fl-Istati Membri tal-UE tal-Lvant tejbu l-prestazzjoni tagħhom bejn l-edizzjonijiet tal-2016 u tal-2019, filwaqt li l-prestazzjoni tar-reġjuni tan-Nofsinhar tal-UE, li wkoll juru livelli relattivament baxxi ta' kompetittività, kienet imħallta. Bejn l-edizzjonijiet tal-2019 u tal-2022, il-biċċa l-kbira tar-reġjuni tal-Lvant tal-UE komplew inaqqsu d-distakk, inkluż fl-Istati Baltiċi, fil-Kroazja, fl-Ungerija, fil-Polonja u fis-Slovenja. Madankollu, partijiet miċ-Ċekja, mir-Rumanija, mis-Slovakkja u mill-Bulgarija tbiegħdu aktar mill-medja tal-UE.
Fin-Nofsinhar tal-UE, ir-reġjuni fil-Portugall, fi Spanja u fil-biċċa l-kbira tal-Greċja tejbu l-prestazzjoni tagħhom (għalkemm dawn tal-aħħar minn livelli baxxi ħafna), iżda l-biċċa l-kbira tar-reġjuni fl-Italja u f'Ċipru tbiegħdu mill-medja tal-UE.
Ir-reġjuni kapitali huma kważi dejjem dawk l-aktar kompetittivi, iżda d-distakk huwa aktar baxx fi Stati Membri aktar kompetittivi
Ir-reġjuni tal-ibliet kapitali huma l-aktar kompetittivi fl-Istati Membri kollha minbarra fil-Ġermanja, fl-Italja u fin-Netherlands. Id-distakk mar-reġjuni l-oħra jista' jkun wiesa' u huwa partikolarment għoli fi Franza, fir-Rumanija u fis-Slovakkja.
Pajjiżi aktar kompetittivi għandhom it-tendenza li jkollhom distakk iżgħar bejn ir-reġjun tal-belt kapitali tagħhom u r-reġjuni l-oħra. Dan jenfasizza li l-politiki u l-investimenti pubbliċi għandhom jippromwovu konverġenza 'l fuq, u dan jgħin lir-reġjuni inqas kompetittivi jtejbu l-prestazzjoni tagħhom u jnaqqsu d-distakk, filwaqt li jiżgura li r-reġjuni l-aktar kompetittivi jkomplu jirnexxu.
Reġjuni aktar kompetittivi għandhom vantaġġi sinifikanti
F'reġjuni aktar kompetittivi, il-PDG per capita huwa ogħla. F'dawn ir-reġjuni, in-nisa għandhom kundizzjonijiet ta' qafas aħjar, għalhekk jistgħu jiksbu riżultati aħjar u nsibu inqas nisa żgħażagħ li la huma f'impjieg, u lanqas fl-edukazzjoni jew fit-taħriġ (rati NEET). Fl-aħħar nett, reġjuni aktar kompetittivi huma partikolarment attraenti għall-gradwati reċenti, peress li huwa aktar faċli li jsibu impjieg hemmhekk.
L-importanza tal-Politika ta' Koeżjoni għall-kompetittività reġjonali tal-UE
Ir-riżultati tal-RCI 2.0 juru kif ir-reġjuni tal-UE għadhom jeħtieġu l-appoġġ tal-UE biex itejbu l-kompetittività tagħhom u jnaqqsu d-distakki bejniethom. Il-Politika ta' Koeżjoni hija l-politika ta' investiment ewlenija tal-UE biex tappoġġja r-reġjuni f'dak li għandu x'jaqsam mal-ħolqien tal-impjiegi, il-kompetittività tan-negozju, it-tkabbir ekonomiku, l-iżvilupp sostenibbli, u biex ittejjeb il-kwalità tal-ħajja taċ-ċittadini.
Il-kompetittività territorjali hija l-kapaċità ta’ reġjun li joffri ambjent attraenti u sostenibbli għan-negozji u r-residenti biex jgħixu u jaħdmu. Dan l-indiċi rivedut jagħtina għarfien aktar profond dwar il-livelli differenti ta’ kompetittività fir-reġjuni tal-UE u huwa għodda prezzjuża għat-tfassil aħjar tal-politika. Hu se jippermettilna nfasslu politiki aħjar, li jistgħu jipprovdu kundizzjonijiet ta’ għajxien attraenti u sostenibbli għaċ-ċittadini fir-reġjuni tal-Ewropa. Dan huwa l-għan ewlieni tal-Politika ta’ Koeżjoni. Peress li kull reġjun huwa uniku, aħna nipprovdu appoġġ imfassal apposta biex nagħtuhom is-setgħa u ngħinuhom jikkapitalizzaw fuq il-punti b’saħħithom u l-assi tagħhom.
Elisa Ferreira, il-Kummissarju għall-Koeżjoni u r-Riformi - 27/03/2023
Sfond
L-RCI, li tnieda fl-2010 u jiġi ppubblikat kull tliet snin, jippermetti li r-reġjuni tal-UE jimmonitorjaw u jivvalutaw l-iżvilupp tagħhom matul iż-żmien u meta mqabbla ma' reġjuni oħra. Huwa għodda importanti li tipprovdi perspettiva Ewropea dwar il-kompetittività tar-reġjuni bbażata fuq 68 indikatur.
L-edizzjoni tal-2022 tal-RCI tuża metodoloġija kompletament riveduta u tikkalkula mill-ġdid iż-żewġ edizzjonijiet preċedenti. Dan l-RCI 2.0 huwa magħmul minn 3 subindiċijiet ta' “Bażiku”, “Effiċjenza” u “Innovazzjoni” u minn 11-il pilastru dwar l-aspetti differenti tal-kompetittività: “Istituzzjonijiet”, “Stabbiltà makroekonomika”, “Infrastrutturi”, “Saħħa”, “Edukazzjoni bażika”, “Edukazzjoni għolja, taħriġ u tagħlim tul il-ħajja”, “Effiċjenza fis-suq tax-xogħol”, “Daqs tas-suq”, “Tħejjija teknoloġika”, “Sofistikazzjoni tan-negozju” u “Innovazzjoni”.
L-RCI 2.0 huwa bbażat fuq ir-reġjuni statistiċi NUTS 2 (Nomenklatura ta' Unitajiet għall-Istatistika Territorjali). L-indikaturi kollha ġew qabel il-gwerra fl-Ukrajna. Din hija l-ewwel edizzjoni tal-RCI mingħajr ir-Renju Unit.