Minn John F. Ryan, l-Aġent Direttur tad-Direttorat tas-Saħħa Pubblika
It-tnaqqis tal-inugwaljanzi fis-saħħa bejn il-gruppi soċjo-ekonomiċi differenti u bejn partijiet differenti tal-UE hi waħda mill-kwistjonijiet jaħarqu li qed tiffaċċja l-Unjoni Ewropea llum. Għal dawn l-aħħar 4 snin, id-direttorat tas-saħħa pubblika f'SANCO kkoordina l-implimentazzjoni ta' "Solidarità fis-Saħħa", l-istrateġija tal-UE biex jiġu indirizzati l-inugwaljanzi fis-saħħa.
Fil-11 ta' Diċembru 2013, il-Kummissjoni ppubblikat ir-rapport iffinanzjat mill-UE "Inugwaljanzi fis-Saħħa fl-UE"
, magħmul minn konsorsju mmexxi minn Sir Michael Marmot tal-University College, Londra. Dan jiġbor fil-qosor evidenza ġdida dwar inugwaljanzi fis-saħħa fl-UE u jivvaluta l-effettività tar-reazzjonijiet politiċi.
Ir-rapport jiżvela xi xejriet importanti: Id-differenzi fl-inugwaljanzi fis-saħħa bejn il-gruppi soċjali madwar l-Istati Membri tal-UE huma allarmanti. Pereżempju, l-istennija tal-ħajja fl-età ta’ 25 għall-irġiel b’edukazzjoni għolja fl-Estonja kien ta’ 17.8 snin aktar, (jew 50% ogħla), minn stennija tal-ħajja għall-irġiel li għandhom biss edukazzjoni primarja. Madankollu, mhux l-aħbarijiet kollha huma ħżiena. Pereżempju, ir-rapport ikkonferma x-xejriet għal tul taż-żmien li jnaqqsu l-lakuni fl-istennija tal-ħajja bejn l-Istati Membri u t-tnaqqis tal-inugwaljanza fl-imwiet tat-trabi.
Għad hemm ħafna xi jsir. Il-maġġoranza tal-Istati Membri tal-UE ma għandhomx strateġiji integrati biex jindirizzaw l-inugwaljanzi fis-settur tas-saħħa.
Sir Michael se jippreżenta wħud mill-iskoperti tar-rapport fil-konferenza finali tal-Azzjoni Konġunta dwar l-inugwaljanzi fis-saħħa li se ssir fit-23 ta' Jannar fi Brussell.
Il-konferenza se teżamina 3 snin xogħol tal-Istati Membri, ir-reġjuni u l-partijiet interessati biex jitnaqqsu l-inugwaljanzi tas-saħħa fl-Ewropa u tikkunsidra l-passi li jmiss. Se tkun imxandra b'mod dirett fuq l-internet b'dawn il-lingwi DE, EL, EN, ES, FR, u IT.
Nittama li se tkun tista' sseġwi billi tkun preżenti jew permezz tal-web.
Il-Kummissjoni se tospita avveniment dwar it-titjib tal-aċċess għas-saħħa u l-ġlieda kontra d-diskriminazzjoni fit-18 ta’ Marzu 2014 fiċ-ċentru għall-konferenzi Charlemagne. Biex tirreġistra, jekk jogħġbok żur il-websajt.
