Le cistiú an Bheartais Chomhtháthaithe in 2021-2027, meastar go dtacófar le cruthú 1.3 milliún post agus go dtiocfaidh méadú 0.5% ar OTI an Aontais ar an meán faoi dheireadh na ndeich mbliana seo, agus méadú suas le 4% i roinnt Ballstát.
- 02 May 2023
Cuideoidh sé freisin le roinnt mhaith earraí poiblí coiteanna a sheachadadh, rud a chuirfidh tairbhí inláimhsithe agus nithiúla ar fáil do shaoránaigh, do réigiúin agus do chathracha na hEorpa. Seo cuid de na conclúidí ó thuarascáil maidir leis an toradh ar chlársceidealú an Bheartais Chomhtháthaithe 2021-2027 a foilsíodh inniu.
Chun an méid sin a bhaint amach, leis an mBeartas Comhtháthaithe scaoilfear méid iomlán infheistíochtaí dar luach EUR 545 bhilliún le linn na tréimhse sin, agus is maoiniú ón Aontas atá i EUR 378 mbilliún de sin. Leis na hinfheistíochtaí sin, cuirfear chun cinn cóineasú socheacnamaíoch marthanach, comhtháthú críochach, Eoraip shóisialta agus chuimsitheach agus aistriú glas agus digiteach atá rianúil agus cothrom.
Eoraip atá níos cliste agus níos iomaíche
Leis an mBeartas Comhtháthaithe, tacaítear go láidir le taighde agus nuálaíocht agus tugtar aghaidh ar an deighilt dhigiteach. Mar shampla, beidh rochtain ag 83,000 taighdeoir ar shaoráidí taighde feabhsaithe agus tabharfar tacaíocht do 725,000 cuideachta don nuálaíocht agus don fhás cliste.
Is é is aidhm don Bheartas tacú le nuachóiriú agus digitiú seirbhísí poiblí (ina bhfuil 22,500 riarachán poiblí páirteach) agus le claochlú digiteach gnólachtaí. Tacaíonn sé freisin le scileanna digiteacha agus bonneagar digiteach a fhorbairt, lena n-áirítear trí 3.1 milliún teaghlach a nascadh le líonraí móibíleacha ardluais agus le bonneagar digiteach seasta.
I dtreo geilleagar carbóin glan-nialasach agus Eoraip atá níos athléimní
Le hinfheistíochtaí glasa sa mhaolú ar an athrú aeráide agus san oiriúnú don athrú aeráide, dírítear ar chuspóirí an Chomhaontaithe Ghlais don Eoraip laghdú 55 % ar a laghad a dhéanamh ar astaíochtaí gás ceaptha teasa an Aontais faoi 2030 agus aeráidneodracht a bhaint amach faoi 2050.
Chuige sin, tacaíonn an Beartas Comhtháthaithe le tionscadail i réimsí na héifeachtúlachta fuinnimh agus an fhuinnimh in-athnuaite a bhfuil tábhacht ar leith ag baint leo chun príomhghníomhaíochtaí faoin bplean REPowerEU a chur chun feidhme. Mar shampla, meastar go dtairbheoidh 32 mhilliún m2 d'fhoirgnimh phoiblí agus 723,000 teaghlach d'fheabhsuithe ar an bhfeidhmíocht fuinnimh agus suiteálfar 9,555 MW d'acmhainneacht bhreise fuinnimh in-athnuaite.
Chun tacú leis an oiriúnú don athrú aeráide agus le bainistiú riosca tubaiste, leis an mbeartas tacófar le 229,000 heicteár de bhonneagar glas nua a thógáil.
Tacófar leis an tsoghluaisteacht inbhuanaithe uirbeach freisin trí 1,230 km de línte tram agus meitreo nua agus nuachóirithe agus 12,200 km de bhonneagar rothaíochta a chur san áireamh.
Beidh 16.4 milliún duine in ann leas a bhaint as uisce glan agus bonneagar fuíolluisce feabhsaithe trí infheistíochtaí Comhtháthaithe.
I dtreo aistriú cóir
Leis an mBeartas Comhtháthaithe, cuidítear leis na daoine agus na críocha is mó atá thíos leis an aistriú chuig an aeráidneodracht chun a chinntiú nach bhfágfar aon duine ar lár.
Dá bhrí sin, tacóidh sé le beagnach 39,000 fiontar chun glacadh leis an aistriú sin. Go háirithe, tairbheoidh breis agus 5,000 gnólacht bheag agus mheánmhéide (FBManna) d'infheistíochtaí i scileanna nua don speisialtóireacht chliste, don aistriú tionsclaíoch agus don fhiontraíocht. Tairbheoidh suas le 120,000 duine dífhostaithe de bhearta tacaíochta maidir leis an margadh saothair agus bainfidh beagnach 200,000 duine cáilíochtaí nua amach.
Eoraip níos sóisialta agus níos cuimsithí
Chun fás sóisialta agus cuimsitheach a chinntiú, agus i gcomhréir le Colún Eorpach na gCeart Sóisialta, tacaíonn na Cistí Comhtháthaithe le daoine, agus ina saol gairmiúil san áireamh. Áirítear leis sin forbairt a dhéanamh ar scileanna agus ar fhoghlaim ar feadh an tsaoil 6.5 milliún duine dífhostaithe ar a laghad - ar tosaíochtaí ríthábhachtacha iad i mBliain Eorpach na Scileanna seo. Cuideoidh sé sin le sprioc 2030 an Aontais a bhaint amach, is é sin 60% ar a laghad de na daoine fásta uile a bheith páirteach in oiliúint gach bliain.
Dírítear go háirithe ar fheabhas a chur ar chomhtháthú agus ar chuimsiú breis agus 3 mhilliún duine, é san áireamh leis sin 600,000 duine i ngrúpaí imeallaithe, mar shampla na Romaigh. Tacóidh na cistí freisin le 1.7 milliún dalta sa bhunoideachas agus sa mheánoideachas agus meastar go ndéanfaidh beagnach 3.5 milliún duine staidéar i saoráidí oideachais nua nó nuachóirithe.
Tairbheoidh sláinte agus cúram fadtéarmach, agus bonneagar agus trealamh san áireamh, d'fheabhsuithe tábhachtacha, agus meastar go bhfaighidh 60 milliún othar comhairle nó cóir leighis i saoráidí cúraim sláinte nua nó nuachóirithe.
Eoraip níos nasctha
Tacóidh an Beartas Comhtháthaithe le córais iompair éifeachtúla ar gach leibhéal críochach, mar shampla an t-iarnród, ceann de na modhanna iompair is sábháilte agus is glaine atá ann: déanfar 3,900 km de línte iarnróid an Ghréasáin Thras-Eorpaigh Iompair (TEN-T) a thógáil nó a nuachóiriú.
Ar deireadh, a bhuí le cláir ar fud an Aontais agus a chomharsana faoin gComhar Críochach Eorpach, déanfar cistí a infheistiú i dtionscadail chomhpháirteacha ina bhfuil níos mó ná 2 mhilliún duine, 40,299 eagraíocht agus 25,456 FBM páirteach.
Cúlra
Is é an Beartas Comhtháthaithe an phríomhionstraim infheistíochta fadtéarmaí san Aontas. Cuireann sé leis an gcomhtháthú eacnamaíoch, sóisialta agus críochach a neartú san Aontas, ceartaíonn sé míchothromaíochtaí idir tíortha agus réigiúin agus comhlíonann sé tosaíochtaí polaitiúla an Aontais.
Cuirtear an Beartas Comhtháthaithe chun feidhme trí roinnt cistí:
- Ciste Forbraíochta Réigiúnaí na hEorpa, lena n-infheistítear i bhforbairt shóisialta agus eacnamaíoch réigiúin agus chathracha uile an Aontais.
- An Ciste Comhtháthaithe, lena n-infheistítear sa chomhshaol agus san iompar i dtíortha an Aontais nach bhfuil chomh rathúil sin.
- Ciste Sóisialta na hEorpa Plus, lena dtacaítear le poist agus lena gcruthófar sochaí atá cothrom agus cuimsitheach go sóisialta san Aontas.
- An Ciste um Aistriú Cóir lena dtacaítear leis na réigiúin is mó a ndéanann an t-aistriú chuig an aeráidneodracht difear dóibh.
Is iad seo a leanas na cuspóirí beartais:
- Eoraip atá níos iomaíche agus níos cliste;
- aistriú níos glaise ísealcharbóin chuig geilleagar carbóin glan-nialasach agus Eoraip athléimneach;
- Eoraip atá níos nasctha trí shoghluaisteacht a fheabhsú;
- Eoraip atá níos sóisialta agus níos cuimsithí;
- Eoraip atá níos gaire do shaoránaigh le haghaidh cur chuige ón mbun aníos a bheadh áitbhunaithe trí chríocha foréigiúnacha agus trí phobail áitiúla a chumhachtú chun a dtosaíochtaí agus a dtionscadail féin a shainaithint ar bhealach comhtháite agus rannpháirteach;
- aistriú cóir i dtreo spriocanna 2030 an Aontais maidir le fuinneamh agus aeráid agus geilleagar aeráidneodrach san Aontas faoi 2050, bunaithe ar Chomhaontú Pháras.
Níl aon amhras ann maidir le rannchuidiú an Bheartais Chomhtháthaithe le hAontas atá níos láidre ná riamh a chruthú. Léirítear sa tuarascáil seo torthaí nithiúla agus an méid ar féidir linn a bheith ag súil leis ó infheistíochtaí Comhtháthaithe ar an talamh le haghaidh na mblianta atá le teacht. Eoraip atá níos iomaíche, níos cliste, níos glaise, níos nasctha agus níos cuimsithí, is í sin ár dtodhchaí a bhuí leis na cistí Comhtháthaithe.
Elisa Ferreira, an Coimisinéir um Chomhtháthú agus um Athchóiriúcháin - 02/05/2023
Is é an Beartas Comhtháthaithe a thugann réigiúin uile an Aontais Eorpaigh níos gaire dá chéile. Cuidíonn sé linn Eoraip atá níos sóisialta agus níos cuimsithí a thógáil. Infheistíonn sé i ndaoine: i dtrealamh digiteach do scoileanna, i gcúram fadtéarmach do dhaoine leochaileacha, agus chun grúpaí imeallaithe a lánpháirtiú sa tsochaí, agus chun cuidiú le daoine dul i mbun oibre. Ba cheart dúinn uile a bheith bródúil as an méid is féidir linn a dhéanamh gach lá ar fud na hEorpa a bhuí leis na cistí comhtháthaithe.
Nicolas Schmit, an Coimisinéir um Poist agus um Chearta Sóisialta - 02/05/2023
More information
- Tuarascáil agus iarscríbhinní, comhaid tíre ina bhfuil na príomhthosaíochtaí agus na príomhthorthaí in aghaidh an Bhallstáit san áireamh
- Ardán Sonraí Oscailte Chistí SIE – Treoir maidir le dul chun cinn infheistíochta
- Ardán Sonraí Oscailte maidir le Comhtháthú
- Kohesio
@VDombrovskis @ElisaFerreiraEC @NicolasSchmitEU @EUinmyRegion @EU_Social