Soluzzjonijiet
Il-klima u t-trasport
X'tip ta' trasport tuża? Il-karozzi, il-ferroviji, il-karozzi tal-linja, id-dgħajjes u l-ajruplani li jaħarqu fjuwils ibbażati fuq iż-żejt huma responsabbli għal madwar kwart tal-emissjonijiet ta’ gassijiet serra fl-UE.
Jeżistu s-soluzzjonijiet!
Fortunatament, it-teknoloġiji ġodda qed jgħinu biex jagħmlu t-trasport aktar konxju mill-klima. Billi jnaqqsu t-traffiku u t-tniġġis, huma qed jagħmlu l-bliet tagħna aktar nodfa wkoll.
Fi triqitna għal trasport aktar nadif
Aktar minn 70% tal-emissjonijiet tat-trasport fl-Ewropa ġejjin mit-trasport bit-triq, iżda grazzi għall-istandards tal-emissjonijiet tas-CO2 tal-UE, il-vetturi qed iniġġsu inqas.
L-UE għandha wħud mill-aktar standards stretti fid-dinja u qed taħdem kontinwament biex issaħħaħhom. Pereżempju, mill-2021, l-istandards ta’ emissjonijiet ta’ CO2 għal karozzi ġodda fl-UE kienu ’l fuq minn 20 % aktar stretti minn dawk fl-2015. Skont proposti ġodda, il-karozzi ġodda kollha li jsiru wara l-2030 iridu jipproduċu 55 % inqas emissjonijiet mill-mira tal-2021 u jipproduċu emissjonijiet żero mill-2035 ’il quddiem.
Ħafna pajjiżi, inklużi l-Istati Uniti, il-Kanada, il-Ġappun u ċ-Ċina introduċew l-istandards tas-CO2 ukoll.
Sensazzjoni elettrika
Il-karozzi ibridi jkollhom magna li tieħu l-fjuwil għall-vjaġġi twal u waħda elettrika bil-batterija li tintuża waqt vjaġġi qosra, ta’ waqfien u startjar.
Il-vetturi b’batterija tal-elettriku m’għandhomx magna li tieħu l-fjuwil – u meta jitħaddmu b’elettriku rinnovabbli ma jarmu l-ebda CO2.
Il-bidla qiegħda fl-arja
L-avjazzjoni hi waħda mis-sorsi ta' emissjonijiet ta' gassijiet serra li qed jikbru bl-aktar rata mgħaġġla.
L-UE għandha liġijiet fis-seħħ sabiex tnaqqas l-emissjonijiet tal-avjazzjoni mit-titjiriet kollha li jsiru ġewwa l-Ewropa u qed taħdem mal-komunità internazzjonali biex tiżviluppa miżuri li jkopru d-dinja kollha.
PARIR SIEWI
Esplora l-alternattivi li hemm għall-ivvjaġġar bl-ajru.
L-ivvjaġġar bl-ajru huwa wieħed mis-sorsi ta' emissjonijiet ta' CO2 li qed jikbru bl-aktar rata mgħaġġla fis-settur tat-trasport.
Kumpens għall-emissjonijiet tal-karbonju
Il-kumpens għall-emissjonijiet tal-karbonju huwa meta tikkalkula l-ammont ta’ karbonju li jiġi rilaxxat minn attività – pereżempju, rikba fuq ajruplan għal distanza twila – u mbagħad tħallas lil organizzazzjoni biex tnaqqas l-emissjonijiet xi mkien ieħor, jew f’xi każijiet, tħawwel is-siġar. Tinstema’ bħala soluzzjoni tajba, iżda xi nies jgħidu li jkun aħjar jekk nagħmlu ħilitna aktar biex noħolqu inqas karbonju mill-ewwel.
Inti x'taħseb?
Il-monitoraġġ tal-industrija tat-tbaħħir
L-emissjonijiet mill-industrija tat-tbaħħir globali jammontaw għal madwar biljun tunnellata ta' CO2 fis-sena, jiġifieri madwar 3% tal-emissjonijiet totali tal-gassijiet serra tad-dinja.
L-UE adottat liġijiet għall-monitoraġġ tal-emissjonijiet minn vapuri kbar li jużaw portijiet tal-UE.
