Chun a chinntiú go mbeidh daoine faoi mhíchumas in ann gluaiseacht faoi shaoirse ar fud an Aontais, mhol an Coimisiún go gcruthófaí:

• leagan nua den Chárta Míchumais Eorpach
• leagan feabhsaithe den Chárta Páirceála Eorpach do dhaoine faoi mhíchumas

Cad iad na cártaí seo?

Cárta Míchumais Eorpach 

Beidh an cárta ina chruthúnas ar stádas míchumais ar fud thíortha uile an Aontais Eorpaigh.

Tabharfaidh sé rochtain chomhionann do shealbhóirí na gcártaí ar choinníollacha speisialta agus ar chóireálacha fabhracha in áit ar bith san Aontas.

Baineann na coinníollacha speisialta le húsáid iompair phoiblí, freastal ar imeachtaí cultúrtha, agus cuairt a thabhairt ar mhúsaeim, ionaid fóillíochta agus spóirt, páirceanna siamsaíochta, agus eile.

Tá na rudaí seo a leanas ar a bhféadfadh a bheith i gceist leo:

• iontráil saor in aisce
• taraifí laghdaithe
• rochtain tosaíochta
• cúnamh pearsanta
• áiseanna soghluaisteachta

Comhlánóidh an cárta Eorpach na cártaí míchumais náisiúnta, agus leanfaidh na húdaráis náisiúnta de bheith á dtabhairt amach bunaithe ar a gcritéir féin.

Cárta Páirceála Eorpach do dhaoine faoi mhíchumas 

Cinnteoidh an leagan feabhsaithe den chárta seo gur féidir le daoine faoi mhíchumas úsáid a bhaint as spásanna páirceála agus as áiseanna atá curtha i leataobh dóibh i ngach tír san Aontas.

Tiocfaidh sé isteach in ionad na gcártaí páirceála náisiúnta.

Cén uair a bheidh na cártaí ar fáil?

An 6 Meán Fómhair 2023, rinne an Coimisiún togra chun an dá chárta sin a chruthú.

Déanfaidh Comhairle an Aontais Eorpaigh agus Parlaimint na hEorpa an méid sin a chaibidliú anois, agus rithfear gníomh dlí, lena gceanglófar ar rialtais an Aontais na cártaí a chur chun feidhme dá náisiúnaigh laistigh de dhá bhliain go leith.

Cad é atá sa togra?

Leagtar síos sa togra na rialacha don dá chárta, maidir leis an méid seo a leanas:

• an fhormáid fhisiciúil
• an próiseas chun teacht ar chomhaontú maidir leis an bhformáid dhigiteach
• na coinníollacha, na rialacha, agus na nósanna imeachta chun cártaí a eisiúint nó a tharraingt siar
• eolas a ghabhann leis atá le cur ar fáil maidir leis na coinníollacha speisialta agus na cóireálacha fabhracha

Ní mór an méid thuas uile a bheith inrochtana do dhaoine faoi mhíchumas.

Cúlra

Tá an tionscnamh seo bunaithe ar an taithí a fuarthas ón tionscadal píolótach reatha maidir le Cárta Míchumais an Aontais i 8 mBallstát agus bunaithe ar Mholadh 98/376 ón gComhairle.

Reáchtáladh comhairliúchán poiblí maidir le tionscnamh an Chárta Míchumais Eorpaigh ó mhí Feabhra go dtí mí na Bealtaine 2023.

Leis an togra le haghaidh an dá chárta, comhlíontar gealltanas a thug an Coimisiún i Straitéis an Aontais Eorpaigh maidir le Cearta Daoine faoi Mhíchumas 2021-2030.