Bħala parti mill-Patt Ekoloġiku Ewropew, ġie stabbilit il-Mekkaniżmu għal Tranżizzjoni Ġusta (JTM) biex l-ebda persuna u l-ebda reġjun ma jitħallew lura fit-tranżizzjoni lejn ekonomija newtrali għall-klima. Dan jinkludi l-Fond għal Tranżizzjoni Ġusta (Just Transition Fund, JTF), li se jinvesti EUR 17,5 biljun fil-perjodu 2021-2027 fit-territorji l-aktar affettwati mit-tranżizzjoni lejn ekonomija newtrali għall-klima.
Ir-Regolament tal-JTF daħal fis-seħħ fl-1 ta’ Lulju 2021. L-Istati Membri diġà qed iħejju l-pjanijiet territorjali għal tranżizzjoni ġusta (territorial just transition plans, TJTP) tagħhom u l-programmi tal-politika ta’ koeżjoni relatati, abbażi tal-Anness D tar-rapport tal-pajjiż tagħhom tas-Semestru Ewropew ta’ Frar 2020.
Dan id-dokument jesprimi l-fehma tas-servizzi tal-Kummissjoni u ma jimpenjax lill-Kummissjoni Ewropea. Il-Qorti tal-Ġustizzja tal-Unjoni Ewropea biss hija kompetenti sabiex tinterpreta b’awtorità d-dritt tal-Unjoni.