Malti
Agħżel il-lingwa
“Nifraħ minn qalbi lill-10 rebbieħa tal-proġetti tal-politika ta’ Koeżjoni tal-UE tal-2021. Dawn huma mudelli għal kull min jixtieq itejjeb il-ħajja tan-nies permezz tal-fondi tal-UE. Nispera li dawn se jispiraw ħafna oħrajn madwar il-kontinent. Bla dubju, permezz ta’ REGIOSTARS tgħallimna li l-eċċellenza u l-innovazzjoni jinsabu kullimkien fl-Ewropa. Kulma trid tagħmel huwa li tfittixhom u tagħtihom l-attenzjoni kif jistħoqqilhom. Se nkomplu nfittxuhom u se nkomplu nappoġġawhom.” Il-Kummissarju għall-Koeżjoni u r-Riformi, Elisa Ferreira.
Il-premjijiet koprew ħames kategoriji u premjijiet tal-vot pubbliku:
“Ewropa INTELLIĠENTI: Inżidu l-kompetittività tan-negozji lokali f’dinja diġitali”, il-premju ngħata lil Integration 3D metal printing mill-Belġju. Il-proġett jappoġġa l-implimentazzjoni tat-teknoloġija tal-istampar 3D bil-metall f’kumpaniji żgħar u ta’ daqs medju (SMEs) permezz ta’ approċċ integrat innovattiv ħafna għall-għarfien u t-teknoloġija. L-idea hija faċilment trasferibbli għal kuntesti oħra bi tradizzjoni industrijali.
“Ewropa EKOLOĠIKA: Komunitajiet ekoloġiċi u reżiljenti f’ambjent urban u rurali”, il-premju ngħata lil ICCARUS (Gent knapt op) talli jipprovdi skema finanzjarja unika għar-rinnovazzjoni tal-akkomodazzjonijiet lil 100 sid ta’ djar vulnerabbli f’Ghent, il-Belġju. Dan il-proġett għandu komponent soċjali b’saħħtu u huwa faċilment trasferibbli, kemm għal postijiet oħra, inkluż għal reġjuni anqas żviluppati, kif ukoll għal setturi oħra.
“Ewropa ĠUSTA: Inrawmu l-inklużjoni u l-ġlieda kontra d-diskriminazzjoni”, ingħata lil TREE - Training for integrating Refugees in the Euregion, li jiffaċilita l-integrazzjoni tar-refuġjati permezz tal-iżvilupp ta’ programm ta’ taħriġ ibbażat fuq il-ħtiġijiet għall-prattikanti li jaħdmu mar-refuġjati u l-migranti, u programm ta’ kwalifika għall-interpreti soċjali Ir-rebbieħa huma min-Netherlands, mill-Ġermanja u mill-Belġju.
Travelling Solidary Cannery ingħata l-premju fil-kategorija, “Ewropa URBANA: Nippromwovu sistemi tal-ikel ekoloġiċi, sostenibbli u ċirkolari f’żoni urbani funzjonali”. Il-proġett jipprovdi lil dawk żvantaġġati l-aċċess għal ikel tajjeb għas-saħħa u ġust bi prezzijiet raġonevoli matul is-sena kollha. Fl-istess ħin, dan jiżviluppa firxa ġdida ta’ professjonijiet iċċentrati fuq il-produzzjoni, il-valorizzazzjoni, il-loġistika u l-kummerċjalizzazzjoni ta’ prodotti lokali, iżda wkoll ta’ prodotti mhux mibjugħa mis-supermarkets jew ħsad żejjed. Ir-rebbieħ huwa mill-Belġju.
Suġġett tas-sena: “Insaħħu l-mobilità ekoloġika fir-reġjuni: Is-Sena Ewropea tal-Ferroviji 2021” ir-rebbieħ huwa North-West Multimodal Transport Hub mir-Renju Unit u mill-Irlanda. Dan il-proġett jipprovdi kapaċità ferrovjarja akbar, bilanċ b’saħħtu tas-servizzi għaċ-ċikliżmu, għat-trasport pubbliku u għall-utenti tal-ivvjaġġar attivi f’Londonderry u bidla modali inkoraġġanti mill-karozza għat-trasport pubbliku.
Fl-aħħar nett, il-“Vot Pubbliku” ġenerali ngħata lil BEGIN, proġett li jgħaqqad il-bliet, iċ-ċittadini, u l-partijiet ikkonċernati permezz tal-ħolqien konġunt ta’ proġetti ta’ infrastruttura blu u ekoloġika f’10 bliet tal-UE fin-Netherlands, fir-Renju Unit, fl-Iżvezja, fil-Belġju, fin-Norveġja u fil-Ġermanja. Il-proġett għandu l-għan li jnaqqas ir-riskju ta’ għargħar b’massimu ta’ 30 % u jtejjeb l-għajxien. Proġetti oħrajn favoriti mal-pubbliku kienu Balkan Road(taħt il-kategorija Ewropa INTELLIĠENTI), Baltazar(il-kategorija Ewropa ĠUSTA), Digital Farming Specialist(il-kategorija Ewropa URBANA) uTransporte A Pedido(il-kategorija Suġġett tas-sena).
Nifraħ lir-rebbieħa kollha għal darb’oħra!
Ara ċ-ċerimonja online
Pjattaforma online tal-Premjijiet REGIOSTARS
Sfond
Il-Premjijiet REGIOSTARS huma l-kompetizzjoni annwali li ilha tiġi organizzata mill-Kummissjoni mill-2008: Din saret it-tikketta ta’ eċċellenza tal-Ewropa għall-proġetti ffinanzjati mill-UE taħt il-politika ta’ Koeżjoni li juru approċċi innovattivi u inklużivi għall-iżvilupp reġjonali.
Kull sena, mijiet ta’ proġetti jikkompetu f’ħames kategoriji: “Ewropa Intelliġenti”, “Ewropa Ekoloġika”, “Ewropa Ġusta”, “Ewropa Urbana”, u s-suġġett tas-sena. Il-pubbliku jista’ jipparteċipa billi jivvota għall-proġett favorit tiegħu fost il-finalisti kollha għall-vot pubbliku.
Billi joħolqu soluzzjonijiet għal sfidi komuni u jisfruttaw l-akbar opportunitajiet, REGIOSTARS ispiraw lir-reġjuni biex jipprovdu politika ta’ Koeżjoni tal-UE li tħalli impatt dejjem akbar.
Għal aktar informazzjoni: