Aħbarijiet dwar ir-Rokna għat-Tagħlim

Qatt staqsejt lilek innifsek x’titjib konkret għamlet l-UE fil-ħajja tiegħek ta’ kuljum, fil-komunità jew f’pajjiżek? L-għodda interattiva msejħa “X’qed tagħmel għalija l-Ewropa” tidentifika l-ħafna modi li bihom l-UE ffinanzjat jew organizzat proġetti diversi li jagħmlu differenza reali għal ħajtek u għan-nies ta’ madwarek. Allura x’inti tistenna? Ħalli lill-istudenti tiegħek jesploraw x’għamlet l-UE għalihom u xxerjah ma’ edukaturi oħra!

F’dawn l-aħħar snin, rajna kemm informazzjoni qarrieqa jew falza malajr tista’ tinxtered online permezz tal-media soċjali u l-pjattaformi tal-messaġġi. Dan is-sett ta’ għodod ta’ diżinformazzjoni li għadu kif ġie aġġornat jagħti s-setgħa lill-għalliema tal-iskejjel sekondarji biex irawmu ħiliet vitali ta’ navigazzjoni online fl-istudenti. Hu jesplora t-tekniki użati fid-diżinformazzjoni bi tliet studji ta’ każijiet ġodda u eżerċizzji fi gruppi li għandhom l-għan li jippromwovu l-ħsieb kritiku. Hu jkopri firxa ta’ suġġetti attwali bħad-demokrazija, it-tibdil fil-klima, u s-saħħa pubblika u jistimula d-djalogu dwar il-ħila ta’ kif wieħed jagħraf dak li hu minnu.

Hekk kif is-sajf joqrob malajr u l-ġranet jitwalu, nibdew naħsbu biex noħorġu ’l barra u ngawdu n-natura jekk jista’ jkun kollha. Il-Logħba tal-Bord dwar l-Azzjoni Klimatika hi mod divertenti u faċli għat-tfal li għandhom bejn disa’ u 12-il sena biex jirrevedu xi fatti relatati mal-ambjent. It-tfal tal-iskola jistgħu jitgħallmu dwar suġġetti li jvarjaw mill-iżolazzjoni termika għall-enerġija mir-riħ u l-logħba tagħti ħjiel lill-imħuħ żgħażagħ kurjużi. Tista’ tiddawnlowdjaha mis-sit tagħna, tipprintjaha u t-tfal tal-klassi tiegħek jistgħu jibdew jilagħbuha mil-lum stess.

Is-sett ta’ għodod “Demokrazija tal-UE fl-Azzjoni” jgħinek tippreżenta temi Ewropej b’mod interessanti, għall-istudenti ta’ 16-il sena u aktar. Hemm erba’ moduli, li jkopru kif tiffunzjona l-UE, l-istrutturi demokratiċi, u l-Inizjattiva taċ-Ċittadini Ewropej (IĊE) li tħalli impatt. L-istudenti tiegħek jistgħu jipparteċipaw f’attivitajiet interattivi li jgħinu fl-iżvilupp tal-ħsieb kritiku, il-promozzjoni u l-ħiliet ta’ preżentazzjoni.

Jista’ jkun ta’ sorpriża għal ħafna żgħażagħ iżda relattivament sa ftit ilu, ħafna Ewropej ma setgħux jesprimu ruħhom b’mod miftuħ. Ċertament ma setgħux jivvutaw. L-Ewropej li għexu matul it-Tieni Gwerra Dinjija jew li kienu qed jgħixu f’dittatorjati fis-seklu 20 spiss setgħu jsibu ruħhom fil-periklu talli kienu biss differenti, minħabba t-twemmin tagħhom, jew għax xtaqu ħajja differenti. F’video ġdid mill-Parlament Ewropew, niltaqgħu ma’ ftit minn dawn in-nies b’messaġġ speċjali għan-neputijiet tagħhom - u għall-Ewropej kollha - qabel l-elezzjonijiet Ewropej ta’ Ġunju. Id-demokrazija minn dejjem kienet fraġli u mod importanti biex din tiġi protetta hu li wieħed jivvota. F’Ġunju, aktar minn 400 miljun persuna fil-pajjiżi kollha tal-UE għandhom id-dritt li jivvutaw għal Parlament Ewropew ġdid.