Il-Ġimgħa tas-Saħħa-e (10-12 ta' Mejju 2011) hu avveniment speċjali li jgħaqqad flimkien dawk li jfasslu l-poliitka, l-industrija, l-innovaturi u l-professjonisti tas-saħħa biex jitgħallmu, jaqsmu l-esperjenzi tagħhom u jispiraw ruħhom.
Fi żmien ta' kriżi ekonomika, ftit huma dawk li jitkellmu dwar l-"investiment", u minkejja dan din se tkun it-tema tal-konferenza din is-sena. Iżda l-investimenti fil-flus mhumiex biżżejjed biex jiggarantixxu t-tħaddim tajjeb tas-Saħħa-e għall-ġenerazzjonijiet futuri: ħafna drabi, l-ikbar ostakli li jxekklu l-ħidma tajba tas-soluzzjonijiet tas-Saħħa-e huma legali, tekniċi, semantiċi u edukattivi.
M'għandniex xi ngħidu, għall-partijiet interessati fis-Saħħa-e hu iktar importanti li jinvestu ħinhom u l-enerġija tagħhom. L-għadd kbir ta' reġistrazzjonijiet għall-Ġimgħa tas-Saħħa-e jagħti x'jifhem li huma lesti jagħmlu dan. Fl-istess spirtu, l-avveniment ta' din is-sena se jkun iktar interattiv u parteċipattiv minn qatt qabel, bl-involviment attiv tad-delegati kollha - sal-livell ministerjali. Il-partijiet interessati se jkollhom l-opportunità li jinteraġġixxu ma' dawk li jfasslu l-politika, u l-parteċipanti se jingħaqdu f'partenarjat biex isibu soluzzjonijiet innovattivi tas-Saħħa-e għal xjuħija attiva u b'saħħitha.
Il-Ġimgħa tas-Saħħa-e hi opportunità għalina biex niffissaw miri ambizzjużi biex niġġieldu ż-żieda tal-kundizzjonijiet tas-saħħa kroniċi permezz ta' soluzzjonijiet tas-Saħħa-e. L-investiment fil-ħin u l-enerġija tagħna llum għandu jagħti riżultati pożittivi fil-forma ta' sistemi tas-saħħa iktar effiċjenti u effettivi għall-ġenerazzjonijiet futuri.