L-4 ta' Frar huwa l-jum fejn kollha kemm aħna niftakru li
l-kanċer għadu jħalli ħerba fis-soċjetajiet Ewropej. Il-kanċer huwa t-tieni
kawża tal-mewt wara l-mard ta' ċirkolazzjoni. Tnejn minn kull għaxar nisa u
tlieta minn kull għaxar irġiel imutu bil-kanċer. Madwar 3.2 miljun Ewropew
jimirdu bil-kanċer kull sena.
Huwa kkalkulat li fl-2005 biss, intilfu 'l fuq minn 17-il sena
ta' ħajja aġġustati għad-diżabbilità minħabba l-kanċer fir-reġjun Ewropew
tad-WHO. Hemm informazzjoni li turi wkoll li l-inċidenza kemm fost in-nisa kif
ukoll fost l-irġiel qed tiżdied minkejja prevenzjoni u trattament aħjar.
Minħabba stennija ta' ħajja aktar twila u popolazzjoni li qed tixjieħ, għandna
nistennew żieda fin-numru ta' pazjenti tal-kanċer, speċjalement fost ix-xjuħ.
Il-piż tal-kanċer bilfors li se jiżdied tul is-snin li ġejjin.
Għaldaqstant, is-Slovenja ddeċidiet li tagħmel il-kanċer
prijorità tas-saħħa waqt il-Presidenza tal-Kunsill tal-Unjoni Ewropea. Apparti
minn hekk, is-Slovenja se tieħu l-koordinazzjoni tal-azzjoni konġunta
tas-Sħubija Ewropea għall-Azzjoni Kontra l-Kanċer.
F'Ġunju 2009, il-Kummissjoni Ewropea ħarġet il-Komunikazzjoni
dwar Sħubija Ewropea għall-Azzjoni kontra l-Kanċer – li ġiet użata bħala l-bażi
għall-Pjan ta' Ħidma 2010 fejn il-kanċer ġie identifikat bħala qasam ta'
prijorità għall-azzjoni. Bl-implimentazzjoni tal-Komunikazzjoni, il-Kummissjoni
għandha l-għan li tappoġġa l-gvernijiet tal-UE u partijiet interessati oħra
biex jaħdmu aħjar fuq livell Ewropew sabiex flimkien jindirizzaw il-piż
tal-kanċer, bl-użu ta' kooperazzjoni u strutturi ta' governanza innovattivi.
Is-Sħubija Ewropea għall-Azzjoni kontra l-Kanċer taqsam tagħrif, riżorsi,
prattiki tajba u esperjenza fil-kontroll u l-prevenzjoni tal-kanċer. Tgħin
ukoll fl-identifikazzjoni ta' azzjoni komuni fil-livell tal-UE li jista' jżid
mal-valur tal-isforzi nazzjonali.
Jekk dawn il-miżuri kollha jintużaw tajjeb, huwa mistenni li
jintleħqu żewġ għanijiet ewlenin: it-tnaqqis tal-piż tal-kanċer fl-UE u
l-indirizzar tal-inugwaljanzi fil-mewt ikkawżat mill-kanċer bejn il-pajjiżi
tal-UE. Għaldaqstant, hemm bżonn ta' azzjoni sostenibbli fit-tul biex tiżgura
ġejjieni ta' saħħa u prosperità għall-Ewropej kollha.