Il-Jum Dinji tas-Saħħa – imfakkar kull sena fis-7 ta' April – jippreżenta opportunità għalina lkoll biex naħsbu dwar saħħitna. Nixtieq nara lill-Ewropej kollha jgħixu f'saħħithom b'aċċess għal kura tas-saħħa ta' kwalità għolja, jgħixu fejn jgħixu. Sfortunatament, ir-realtà hi differenti.
Fl-Ewropa, jeżistu inugwaljanzi kbar fil-qasam tas-saħħa kemm fil-pajjiżi kif ukoll bejniethom. In-nies f'ħafna mill-pajjiżi membri l-ġodda tal-UE mil-Lvant ma jgħixux daqs dawk tal-Punent. Il-medja tal-għomor għan-nisa tvarja sa 8 snin skont il-pajjiż. Għall-irġiel, tvarja b'14-il sena. Id-distakk fis-snin ta' ħajja sana huwa saħansitra akbar – għan-nisa jista' jilħaq it-18-il sena. Biex tiġi indirizzata din il-kwistjoni, sa l-aħħar tal-2009 għandha tiġi adottata proposta tal-Kummissjoni dwar it-tnaqqis tal-inugwaljanzi fis-saħħa fl-UE.
Illum qed niffaċċjaw kriżi ekonomika li tista' titfa' lura s-saħħa tal-Ewropej. Fi żminijiet bħal dawn, il-ħarsien tas-saħħa pubblika hija iktar importanti. Bla dubju ta' xejn, is-saħħa hija parti essenzjali mill-ħajja. Iżda hi wkoll ass ekonomiku. Popolazzjoni f'saħħitha tfisser forza tax-xogħol produttiva li tista' tkompli taħdem u tikkontribwixxi b'mod produttiv hekk kif tixjieħ.
Il-kriżi tolqot lil gruppi vulnerabbli fil-laħam il-ħaj – iż-żgħażagħ, il-migranti, il-pensjonanti. Neħtieġu interventi mmirati tas-saħħa biex nipproteġu lil dawn in-nies. U biex niżguraw li kulħadd ikollu t-tagħrif u l-kura li jeħtieġ biex jgħix f'saħħtu u bla mard.
Il-Kummissjoni Ewropea għandha rwol importanti – li tgħin lill-pajjiżi tal-UE jinvestu fis-saħħa u jużaw ir-riżorsi tal-kura tas-saħħa b'mod effettiv. Dan mhux iż-żmien li nnaqqsu l-baġit tas-saħħa u li nitfgħu l-ispejjeż fuq il-pazjent li diġà qed jitħabat b’pagi iktar baxxi. Ma nistgħux ninsew li l-ikbar rikkezza tagħna hi saħħitna.
