Jekk l-innovazzjoni eSaħħa tintuża kif suppost din tgħin biex tindirizza l-isfidi essenzjali u magħrufa li s-sistemi tal-kura tas-saħħa Ewropej qed iħabbtu wiċċhom magħhom. Fosthom insibu ż-żieda fid-domanda minħabba tibdil demografiku, iż-żieda fid-domanda għall-kwalità minn pazjenti u ċittadini infurmati u mogħtija s-setgħa kif ukoll iż-żieda fid-domanda għall-effiċjenza u s-sostenibilità finanzjarja.
Xhieda ta' dan huwa d-diskors fuq livell tal-UE li seħħ matul dawn l-aħħar snin minn partijiet interessati varji. Il-komunikazzjoni reċenti tal-UE dwar it-telemediċina hija sejħa importanti għal azzjoni lejn koerenza politika ulterjuri, trasparenza legali u rieda politika biex jitħaffu l-isforzi għall-kisba tas-soluzzjonijiet tal-eSaħħa u l-interoperabilità tat-teknoloġiji u s-sistemi madwar il-pajjiżi tal-UE.
Mill-perspettiva ta' pazjent probabilment l-aktar aspett importanti tal-komunikazzjoni huwa l-bżonn li tinbena l-kunfidenza u l-fiduċja fis-soluzzjonijiet tal-eSaħħa. Il-Forum Ewropew għall-Pazjenti jara potenzjal enormi għall-eSaħħa fir-rigward l-informazzjoni għall-pazjenti; l-immaniġġjar tal-mard li tkun ikkonċentrata madwar il-pazjent; id-djalogu professjonali fuq il-kura tas-saħħa tal-pazjent; il-kura tas-saħħa personalizzata; il-mobilità; il-kwalità u l-kontinwità tal-kura u s-sigurtà tal-pazjent.
Il-pazjenti għandhom jiġu involuti fl-iżvilupp tas-soluzzjonijiet tal-eSaħħa jekk dawn għandhom jagħtu l-frott. Barra minn hekk l-eSaħħa se taħdem biss għall-individwi, is-soċjetà u l-ekonomija jekk ikun hemm rikonoxximent xieraq għal
• l-aspetti etiċi tal-esaħħa id-dinjità, il-kunsens, il-kunfidenzjalità u l-privatezza
• il-bżonn ta' għarfien dwar l-eSaħħa min-naħa tal-pazjenti u l-professjonisti tas-saħħa.
Mingħajr dubju dawn se jkunu fost il-kwistjonijiet importanti li se jiġu diskussi waqt il-konferenza tal-eSaħħa fi Praga.