L-għodod għall-kampjunar kollha jridu ikunu ddisinjati u mmanifatturati b’mod li jservu għall-iskop maħsub tagħhom u jippreservaw il-karatteristiċi oriġinali tal-oġġetti li tagħhom ikun qed jittieħed kampjun.
L-għodod għall-kampjunar iridu jissodisfaw dawn ir-rekwiżiti ġenerali:
- iridu jkunu b’saħħithom biżżejjed sabiex jifilħu għall-operazzjonijiet ta’ tqandil manwali;
- iridu jkunu jistgħu jitnaddfu faċilment;
- il-partijiet kollha jridu jkunu magħmula minn materjali reżistenti għal:
- l-effetti tal-oġġetti li tagħhom ikun qed jittieħed kampjun (eż. aċidu tal-frott jew sustanzi kimiċi);
- l-aġenti tat-tindif (eż. bliċ jew aġenti tensjoattivi);
- iridu jikkonformaw ukoll mar-rekwiżiti tas-sikurezza.
Dejjem għandek tiċċekkja jekk humiex nodfa qabel tużahom. Wara li tużahom, għandek tnaddaf l-għodod għall-kampjunar skont l-istruzzjonijiet speċifiċi.
Kampjunar tal-likwidi: Jistgħu jintużaw l-għodod li ġejjin:
pompi li joħolqu vakwu, kontenituri għall-immersjoni, kampjunaturi tat-tip pipetta, sassli għall-kampjunar, kampjunaturi pistun-tubu eċċ.
Kampjunar ta’ solidi fil-forma ta’ trab jew ta’ granijiet: Jistgħu jintużaw l-għodod li ġejjin:
kampjunaturi f’għamla ta’ lanzetta, kampjunaturi tat-tip tubu, kampjunaturi għal żona speċifika, kampjunaturi f’għamla ta’ kazzola, kampjunaturi spirali, kampjunaturi għall-oġġetti ffriżati, kampjunaturi f’għamla ta’ trapan żgħir, eċċ.
Kampjunar tal-gassijiet: Il-kampjunar jirrikjedi
ċilindru tal-metall (
ċilindru tal-kampjun) għall-ġbir u t-trasport. Iċ-ċilindru tal-kampjun huwa assemblaġġ li jinkludi
ċilindru kklassifikat skont il-pressjoni u
valvi tal-iżolament tal-bokka u tal-iżbokk.
Għodod oħrajn adattati, simili għal dawk deskritti hawn fuq, jistgħu wkoll jintużaw għall-kampjunar, sakemm ikunu jistgħu jwettqu l-operazzjonijiet deskritti u jissodisfaw ir-rekwiżiti tas-sikurezza. Għodod oħrajn jistgħu jintużaw għall-aggregazzjoni tal-kampjuni primarji jew għall-omoġenizzazzjoni, is-separazzjoni, it-tnaqqis, il-qsim, eċċ. tal-kampjuni finali. Għal dan l-iskop, jistgħu jintużaw diversi kaxxi tal-plastik jew tal-metall, btieti, kanisters, bramel, eċċ. li jkunu mgħammra b’ħawwada xierqa. Meta wieħed juża l-kontenituri għall-immersjoni jistgħu jintużaw diversi rkiekel li jitħaddmu bl-idejn u kejbils għat-tniżżil u t-tlugħ tal-kontenitur.
Għodod ġenerali oħra jistgħu jkunu utli matul il-kampjunar, pereżempju sikkina jew cutter, imqass, tongs, xkupilji għat-tindif, tejp li jwaħħal jew li jissiġilla, pinna, torch, eċċ.
L-għodda għall-kampjunar maħsuba għall-kampjunar tal-prodotti tal-petroleum, solventi organiċi u likwidi u gassijiet oħrajn li jaqbdu malajr jridu jkunu approvati għal użu bħal dan. Dawn iridu jkunu magħmula minn materjal elettrokonduttiv biżżejjed sabiex jipprevjeni l-ġenerazzjoni ta’ elettriċità statika u m’għandhomx joħolqu xrar meta jiġu f’kuntatt ma’ oġġett ieħor tal-metall.
L-għodod għall-kampjunar ta’ likwidi fil-fond għandhom jintrabtu ma’ spaga, ħabel jew katina twal biżżejjed sabiex jittieħdu kampjuni minn kwalunkwe livell meħtieġ. L-ispag, il-ħbula u l-ktajjen użati għall-kampjunar ta’ likwidi li jaqbdu malajr ħafna jridu jkunu magħmula minn materjal li jipprevjeni l-ġenerazzjoni ta’ elettriċità statika.
It-tabella tinkludi l-għodod għall-kampjunar adattati għal tipi differenti ta’ oġġetti. Id-disponibbiltà u d-disinn tal-għodod għall-kampjunar jistgħu jvarjaw minn Stat Membru għal ieħor. Għaldaqstant il-lista mhijiex eżawrjenti u jistgħu jintużaw għodod oħrajn għall-kampjunar skont in-natura tal-oġġetti li minnhom irid jittieħed kampjun.
