Ciste Sóisialta na hEorpa (CSE)
Infheistíocht i ndaoine
Is é CSE phríomh-uirlis na hEorpa chun fostaíocht agus cuimsiú sóisialta a chur chun cinn - cabhrú le daoine post a fháil (nó post níos fearr a fháil), daoine faoi mhíbhuntáiste a chomhtháthú sa tsochaí agus deiseanna saoil níos cothroime a chinntiú do chách.
Déantar é sin trí infheistiú i muintir na hEorpa agus a gcuid scileanna - idir fhostaithe agus dífhostaithe, idir óg agus aosta.
Gach bliain, cuidíonn an Ciste le thart ar 10 milliún duine obair a fháil, nó chun a gcuid scileanna a fheabhsú chun obair a aimsiú amach anseo.
Tá tábhacht leis an méid seo:
- sa ghearrthéarma - chun iarmhairtí na géarchéime eacnamaíche atá ann faoi láthair a mhaolú, go háirithe an t-ardú i leibhéal na dífhostaíochta agus na bochtaineachta;
- san fhadtéarma - mar chuid de straitéis na hEorpa chun a geilleagar a athmhúnlú, agus ní hamháin poist, ach sochaí chuimsitheach, a chruthú.
Le seasca bliain anuas, tá an Coimisiún Eorpach ag obair i gcomhpháirt leis na Ballstáit le seans a thabhairt do dhaoine a ndeiseanna fostaíochta a fheabhsú. I rith 2017, beidh 60 bliain de CSE á chomorádh le hócáidí réigiúnacha agus náisiúnta.
Maoiniú agus cuspóirí in 2014-20
Sa tréimhse seo, cuirfidh an CSE thart ar €80 billiún (i bpraghsanna reatha) i maoiniú ar fáil chun:
- daoine a oiliúint agus chun cabhrú leo dul ag obair
- cuimsiú sóisialta a chur chun cinn
- oideachas & oiliúint a fheabhsú
- caighdeán na seirbhísí poiblí i do thírse a fheabhsú.
Breis eolais faoi chuspóirí CSE do 2014-20
Conas a roinntear na cúraimí?
Is iad Rialtais AE, Parlaimint na hEorpa agus an Coimisiún le chéile a chaibidlíonn agus a chinneann straitéis agus buiséad CSE.
Is iad na rialtais agus an Coimisiún Eorpach a phleanálann agus a fhormheasann a chláir oibríochta 7 mbliana.
Tugtar maoiniú do réimse leathan eagraíochtaí – comhlachtaí poiblí, cuideachtaí príobháideacha agus an tsochaí shibhialta – eagraíochtaí a thugann cúnamh praiticiúil do dhaoine le post a fháil, nó leis an bpost atá acu a choimeád.