Din is-sena kienet importanti għall-qasam tal-farmakoviġilanza fl-Unjoni Ewropea. Wasslet għall-applikazzjoni ta' regoli ġodda li ġew miftiehma fl-2010. Dan ix-xahar se jkun hemm emenda oħra tal-leġiżlazzjoni li mistennija tkun applikata bis-sħiħ sa l-aħħar tal-2013.
Il-prodotti mediċinali kollha fl-UE huma suġġetti għall-ittestjar strett u l-istima tal-kwalità, is-sigurtà u l-effikaċja tagħhom qabel ma jiġu awtorizzati għat-tqegħid fis-suq. Ladarba prodott mediċinali jkun ġie awtorizzat, is-sigurtà tiegħu tibqa' tiġi segwita biex ikun żgurat li tittieħed azzjoni ta' saħħa pubblika meta jkun hemm reazzjonijiet ħżiena li jippreżentaw livell ta' riskju inaċċettabbli. Dan il-monitoraġġ jissejjaħ farmakoviġilanza.
Is-sistema tal-farmakoviġilanza tal-UE hija waħda mill-aktar sistemi komprensivi u avvanzati fid-dinja. Hija tirrappreżenta sistema b’saħħitha u trasparenti biex jiġi żgurat livell għoli ta’ protezzjoni tas-saħħa pubblika madwar l-UE.
Issa l-pazjenti madwar l-UE jistgħu jirrapportaw direttament onlajn jew bil-posta lill-awtorità nazzjonali tagħhom kwalukwe reazzjonijiet ħżiena li ġarrbu. Is-sena d-dieħla, se jiġi inkluż "simbolu iswed” fl-informazzjoni dwar mediċini li huma taħt monitoraġġ addizzjonali, pereżempju dawk li jkollhom xi ingredjent farmaċewtiku ġdid. Pazjenti, tobba, infermiera u professjonisti oħra tas-saħħa b’mod partikulari se jkunu mħeġġa jirrapportaw kull reazzjoni ħażina ta' dawn il-mediċini.
Il-leġiżlazzjoni dwar il-farmakoviġilanza hija parti mir-Regolament tal-UE dwar il-mediċini li tiżġura s-sikurezza tal-mediċini madwar l-UE.