Il-marda tal-Alzheimer u dimenzji oħra jaffettwaw 7 miljun Ewropew u 20 miljun membru tal-familja li jieħdu ħsiebhom. Dan in-numru mistenni jirdoppja sal-2040. Settembru 2012 huwa l-ewwel Xahar Dinji tal-Marda tal-Alzheimer, kampanja internazzjonali biex tqajjem għarfien dwar il-marda. It-tema ta' din is-sena hi 'Id-Dimenzja: Ngħixu flimkien'.
Minħabb l-prevalenza, l-ispiża u l-impatt kbir fuq is-soċjetà, id-dimenzja hi prijorità tas-saħħa pubblika tal-UE. It-titjib tal-kura u l-kwalità tal-ħajja għall-persuni li jgħixu bid-dimenzja u għal dawk li jieħdu ħsiebhom huma prijoritajiet urġenti. Jeħtieġ ukoll li jonqos il-piż tat-telf tal-awtonomija u titħeġġeġ is-solidarjetà bejn il-ġenerazzjonijiet.
L-għan tal-Azzjoni Konġunta ALCOVE hu li jinqasam l-għarfien dwar id-dimenzja fil-qasam tas-saħħa pubblika, l-organizzazzjoni tal-kura, il-kura klinika, u l-etika. L-Azzjoni Konġunta hi appoġġata mill-Istati Membri, il-professjonisti tas-saħħa u l-assoċjazzjonijiet tal-pazjenti, u tikkomplementa inizjattivi oħrajn tal-UE dwar id-dimenzja u x-xjuħija b'saħħa tajba.
F'Marzu 2013, id-19-il pajjiż ta' ALCOVE se jippreżentaw il-konklużjonijiet tagħhom b'għarfien li jkunu jistgħu jgawdu minnu l-Istati Membri kollha. L-istrumenti ta' din l-inizjattiva għandhom jiffaċilitaw l-implimentazzjoni tal-azzjonijiet tas-saħħa pubblika inkluża l-prevenzjoni tar-riskji assoċjati mal-użu tal-antipsikotiċi.
Quddiem l-isfida dejjem tikber tad-dimenzja, hu importanti għas-soċjetà tagħna u għall-mekkaniżmi ta' solidarjetà li niġbru l-għarfien u l-esperjenzi kollha flimkien. Il-mobilizzazzjoni Ewropea fir-rigward tad-dimenzja hi espressjoni ta' din il-ħtieġa u tal-interess reċiproku.
