L-inċidenti u l-korrimenti huma r-raba' kawża prinċipali ta' mewt fost il-popolazzjoni tal-UE. Waħda minn 10 ammissjonijiet fl-isptar hi relatata ma' korriment u għalhekk jitfgħu piż finanzjarju konsiderevoli fuq is-sistemi tas-saħħa, stmat għal madwar EUR 15-il biljun fis-sena fir-reġjun tal-UE. Hemm ukoll differenzi enormi fost l-Istati Membri fir-rigward tar-riskju ta' inċidenti u korrimenti.
Il-korrimenti fil-biċċa l-kbira jistgħu jiġu evitati. Il-politiki tal-prevenzjoni jeħtieġ li jkunu msejsa fuq tagħrif adegwat dwar il-gruppi fir-riskju, ir-riskji u l-kawżi. Sfortunatament, fil-parti l-kbira tal-pajjiżi l-informazzjoni dwar il-kawżi tal-inċidenti u l-korrimenti rarament tinġabar. Għalhekk ir-Rakkomandazzjoni tal-Kunsill dwar il-prevenzjoni tal-korrimenti u l-promozzjoni tas-sikurezza (2007) bir-raġun irrakkomandat biex l-Istati Membri jiżviluppaw sistemi nazzjonali ta' sorveljanza u rappurtar tal-korriment, li għandhom jimmonitorjaw l-evoluzzjoni tar-riskji ta' korriment u l-effetti ta’ miżuri ta’ prevenzjoni matul iż-żmien.
Is-settur tas-saħħa, biex jindirizza r-rata tal-korrimenti, jista' jiżvela evidenza dwar il-firxa u l-karatteristiċi tal-problema tal-korrimenti u jippromwovi azzjonijiet konċertati.
Bi tweġiba għal din is-sejħa, ikkoordinata minn EuroSafe, 22 pajjiż ipparteċipaw f'azzjoni konġunta, biex sal-2015 ikun hemm sistema waħda komuni ta' ġbir tad-dejta ta' korrimenti ibbażata fuq id-dipartimenti tal-emerġenza fl-Istati Membri kollha tal-UE: l-Azzjoni Konġunta għall-Monitoraġġ tal-Korriment fl-Ewropa (JAMIE). Se tkun sistema biex isservi bħala bażi għal benchmarking u t-tfassil ta’ politiki ta’ prevenzjoni adegwati, fil-livelli tal-UE u nazzjonali.
Ir-Rakkomandazzjoni tal-Kunsill ħeġġet ukoll lill-gvernijiet biex jistabbilixxu pjanijiet nazzjonali għall-prevenzjoni tal-inċidenti u l-korrimenti. Matul l-aħħar ftit snin, inbdew proġetti kollaborattivi fl-oqsma tal-promozzjoni tas-sikurezza tat-tfal, is-sikurezza fl-isport, u s-sikurezza tal-persuni anzjani. Dawn l-azzjonijiet, koordinati wkoll minn EuroSafe, jinkludu għadd dejjem jikber ta’ msieħba mill-Istati Membri kollha u kellhom impatt sinifikanti fuq il-politiki u l-azzjonijiet dwar il-prevenzjoni tal-korrimenti fil-pajjiżi msieħba u l-komunitajiet lokali.
Il-Kummissjoni bħalissa qiegħda tagħmel studju ta' valutazzjoni biex tiddetermina jekk il-miżuri proposti humiex qegħdin jaħdmu b’mod effettiv u biex tanalizza l-bżonn għal aktar azzjonijiet.
Sadanittant nawguraw il-qarrejja kollha tan-Newsletter Saħħa-UE staġun tas-sajf bla problemi ta' saħħa. Is-sajf huwa żmien perfett għal attivitajiet avventurużi fil-beraħ bħaċ-ċikliżmu fuq il-muntanji, l-għawm u l-mixi, spiss f'postijiet mhux familjari. Kun żgur li tipprepara sew, tuża tagħmir tajjeb u tobdi l-istruzzjonijiet tas-sigurtà: 'Aħjar uff inkella aħħ!'
