F’Mejju, id-Direttorat Ġenerali għas-Saħħa u l-Konsumaturi tal-Kummissjoni Ewropea nieda Heidi, il-wiki dwar is-saħħa.
Heidi (Is-Saħħa fl-Ewropa: Interface ta' Informazzjoni u Dejta) hu mod ġdid kif tinxtered l-informazzjoni dwar is-saħħa fl-Ewropa. Għalkemm Heidi ġie stabbilit mid-DĠ għas-Saħħa u l-Konsumaturi, il-Kummissjoni mhix se tipprovdi l-artikli fil-wiki. Minflok, Heidi se jkun ibbażat fuq kontribuzzjonijiet minn esperti tas-saħħa Ewropej.
Heidi għandu l-għan li joħloq sistema sostenibbli għal informazzjoni dwar is-saħħa li hija rilevanti, affidabbli u, aktar importanti, li faċilment tinżamm aġġornata. Bil-kunċett tal-wiki, il-Kummissjoni qed tipprova tgħaqqad flimkien il-komunità ta' esperti biex jaqsmu, jqabblu u jiżviluppaw informazzjoni dwar is-saħħa madwar l-Ewropa.
Bħala wiki, Heidi hu pjattaforma dinamika fejn l-utenti jistgħu jikkoreġu informazzjoni eżistenti u jippubblikaw dejta ġdida malajr. Jistgħu wkoll jagħtu rispons u jiddiskutu l-kwalità jew l-utilità tad-dejta.
Heidi fih artikli dwar l-istatus tas-saħħa, id-determinanti, il-mard, is-sistemi tas-saħħa, ix-xejriet, l-aspetti istituzzjonali u politiċi. L-artikli huma bbażati fuq evidenza xjentifika.
Biex isir sors utli ta' informazzjoni, Heidi jeħtieġ input mir-riċerkaturi, l-akkademiċi u esperti oħra tas-saħħa. Bl-għajnuna tagħhom, il-kontenut ta' Heidi jista’ jiġi aġġornat, estiżi u arrikkit, sabiex isir tabilħaqq rapport ħaj dwar is-saħħa fl-Ewropa.
