Il-Kanser jista' jiġi evitat! Dan huwa l-messaġġ importanti li qed iwasslu l-għaqdiet tal-kansers u oranizzazzjonijiet imsieħba fil-pajjiżi Ewropej waqt il-Ġimgħa Ewropea Kontra l-Kanser li ssir kull sena f'Mejju.
Għal darba oħra, l-avveniment ta' din is-sena qed jiġi kkoordinat mill-Assoċjazzjoni tal-Għaqdiet Ewropej tal-Kanser (ECL), bħall-Programm ta' qabel "L-Ewropa Kontra l-Kanser". It-tnedija l-ġdida ta' din il-ġimgħa ddedikata għall-kanser tagħmel parti mir-rwol tagħna, li huwa l-promozzjoni tas-saħħa u l-prevenzjoni tal-kanser mal-Sħubija Ewropea għall-Azzjoni Kontra l-Kanser (EPAAC) 2011-2014.
Matul din il-ġimgħa, l-Ewropej madwar l-Unjoni Ewropea u lil hinn se jiġu mgħarrfa li huwa possibbli għalina, bħala individwi, li nnaqqsu r-riskju tal-kanser b'tal-anqas 33% (u saħansitra sa 50%, skont studju ġdid ippubblikat f'Marzu 2012), jekk inkunu nistgħu nindirizzaw il-fatturi ewlenini bħat-tipjip, l-ikel ħażin, in-nuqqass tal-attività fiżika u x-xorb żejjed. Irridu niftakru li għandna lkoll strument tajjeb fil-ġlieda kontra l-kanser, li sfortunatament ma tantx nużaw – il-Kodiċi Ewropew kontra l-Kanser, li jelenka l-metodi kollha biex nipprevjenu l-kanser.
Biex ninvolvu ż-żgħażagħ, bdejna Kompetizzjoni taż-Żgħażagħ u qed nistiednu żgħażagħ minn madwar l-Ewropa biex jissottomettu filmat jew powster li jispjega l-prevenzjoni tal-kanser. B'din l-inizjattiva, qed nisperaw li nħeġġuhom u li nitgħallmu mingħandhom, xi ħaġa li s'issa ma tantx għadna rnexxielna nagħmlu – nilħqu liż-żgħażagħ. Qed naħdmu wkoll ma' għaqdiet minn madwar l-Ewropa biex norganizzaw xi flashmobs. Se jkun hemm flashmob kbir quddiem it-taraġ ta' Piazza di Spagna f'Ruma (ikkoordinat mill-Għaqda kontra l-Kanser tal-Italja), fis-26 ta' Mejju, qabel il-Konferenza Uffiċjali tal-Ġimgħa Ewropea Kontra l-Kanser li tiftaħ fil-31 ta' Mejju, fil-Ministeru tas-Saħħa tal-Italja.
Ninsabu kuntenti li għandna daqstant imsieħba f'din il-ħidma kontra l-kanser u favur il-promozzjoni tas-saħħa. Il-prevenzjoni hija l-aktar investiment importanti tagħna. Toffri "l-istrateġija l-iktar effettiva f'sens ta' nfiq għall-futur imbiegħed għall-kontroll tal-kanser".