Is-saħħa hija valur. L-Ewropej iridu sistemi tas-saħħa ta' kwalità għolja għax is-saħħa hija għan li kulħadd jixtieq jikseb. Iżda s-saħħa għandha wkoll rwol importanti fl-ekonomija tagħna.
Is-saħħa toħloq l-impjiegi u tgħin biex dawn jinżammu. Wieħed minn kull għaxar impjegati fl-Ewropa huwa impjegat fis-settur tas-saħħa. Persuna b'saħħitha tista' ssib xogħol iktar faċilment u tkun iktar produttiva.
Is-saħħa tnaqqas il-faqar. Il-pajjiżi Ewropej qablu li kulħadd għandu jkollu aċċess għall-kura tas-saħħa: dan id-dritt huwa stabbilit fil-Karta tad-Drittijiet Fundamentali. U l-garanzija tal-aċċess għall-kura tas-saħħa hija waħda bill-ħolqiet fil-"katina soċjali" li żżomm in-nies 'il bogħod mill-faqar.
Is-saħħa tagħmel kontribut għall-innovazzjoni. Wħud mill-iktar oqsma innovattivi fl-ekonomija tagħna huma marbuta direttament mar-riċerka fis-saħħa: farmaċewtika, tagħmir mediku u bioteknoloġija.
Iżda s-saħħa tiswa l-flus ukoll. Il-gvernijiet jużaw madwar parti minn sitta tal-baġits tagħhom biex jiżguraw kura tas-saħħa ta' kwalità għolja - pereżempju, billi jiffinanzjaw persunal ta' kwalità u mħarreġ sew, tagħmir ta' teknoloġija għolja u mediċini innovattivi.
Dawn il-flus iridu jintefqu sew. U għalhekk il-Kummissjoni Ewropea tinvesti f'għodod biex tivvaluta aħjar l-effettività relattiva tat-teknoloġiji tas-saħħa, tinkoraġġixxi riflessjoni konġunta dwar modi kif il-gvernijiet nazzjonali jagħtu l-kura u tagħmel sforz kontinwu biex tippromwovi stili tal-ħajja b'saħħitha: in-nutrizzjoni aħjar, l-attività fiżika sikura u l-waqfien mit-tipjip. Għalkemm ikollok aċċess għall-aħjar sistemi tal-kura tas-saħħa, dejjem aħjar ma timradx u tkun b'saħħtek.