Mill-ewwel ċelebrazzjonijiet tal-Jum Internazzjonali tan-Nisa fil-bidu tad-disgħinijiet, ħafna tibdiliet u żviluppi ħallew impatt fuq il-ħajja tan-nisa u r-rwol tagħhom fis-soċjetà. In-nisa akkwistaw is-setgħa, iżda għadhom xorta waħda ta' kuljum jiffaċċjaw riskji abbażi ta' sess. Is-saħħa tan-nisa fl-Ewropa hi waħda mill-preokkupazzjonijiet primarji tagħna.
L-istennija ta' ħajja għan-nisa fl-Ewropa qed tikber, iżda dan mhux dejjem jista' jingħad l-istess għall-kwalità ta' ħajjithom. Nikkalkulaw li 75% biss tas-snin li mara Ewropea tgħix huma tajbin għas-saħħa. Tistgħu timmaġinaw it-tbatija, it-telf u l-ispejjeż li din iċ-ċifra tirrappreżenta.
Jeżistu ħafna oqsma fejn is-saħħa tan-nisa għandha riskju partikulari. Il-kanċer hu eżempju ta' marda li tista' tbiddel kemm ħajjet il-mara u l-ambjent soċjali tagħha b'mod irreparabbli. Il-kanċer tas-sider u dak ċervikali huma kawżi importanti ta' mortalità u ta' morbożità.
Il-kanċer tas-sider hu sfida ewlenija. Dan hu bil-wisq l-aktar kanċer komuni fin-nisa fl-Unjoni Ewropea (kważi wieħed minn kull tliet każijiet) u hu għalihom it-tieni l-aktar kawża li twassal għal mewt.
Din is-sitwazzjoni tirrappreżenta wkoll sfida ewlenija għal dawk kollha impenjati li jnaqqsu t-tbatija kkaġunata mill-kanċer tas-sider – il-professjonisti tas-saħħa, l-organizzazzjonijiet tas-soċjetà ċivili, dawk li jagħtu kura, il-komunità xjentifika, dawk li jieħdu d-deċiżjonijiet u l-industrija. Matul dawn l-aħħar żewġ decennji, sar ħafna progress, bis-saħħa fil-biċċa l-kbira tal-azzjoni tal-UE.
Biex iġġedded l-involviment tagħha biex jitjiebu l-prevenzjoni u l-kontroll tal-kanċer, l-Unjoni Ewropea nediet il-Partenarjat Ewropew għal Azzjoni Kontra l-Kanċer fl-2009. Il-Partenarjat jappoġġa lill-Istati Membri fl-isforzi tagħhom biex jitnaqqsu l-każijiet ġodda ta' kanċer bi 15% sal-2020 u biex jiżviluppaw pjanijiet nazzjonali għall-kontroll tal-kanċer.
Prevenzjoni aħjar hi prijorità ewlenija għall-isforzi biex jiġi miġġieled il-kanċer, bħalma hi għal ħafna mard ieħor. Nikkalkulaw li wieħed minn tliet kankrijiet jista' jiġi evitat. Kif jingħad, uqija prevenzjoni tiswa daqs libbra kura. Nafu bil-fatturi ta' riskju u l-għajnuna biex il-pubbliku jevitahom għandha tkun fokus ewlieni għall-isforzi tagħna.