Is-saħħa hi kruċjali għall-ħajja tal-bniedem. Is-saħħa tiddetermina l-kapaċità tal-persuni biex jagħtu kontribut lis-soċjetà, biex jissodisfaw l-aspirazzjonijiet tagħhom, biex igawdu l-ħajja. In-nies iridu jkunu jafu dwar is-saħħa u l-ġurnalisti għandhom rwol ewlieni biex jinfurmawhom. Hu għalhekk li l-Premju tal-UE għall-Ġurnalisti fil-Qasam tas-Saħħa għandu l-għan li jippreżenta u jippremja l-aqwa ġurnaliżmu tas-saħħa fl-UE, biex titqajjem iktar kuxjenza u jitqanqal id-dibattitu.
Bi pjaċir inħabbar u nawgura lir-rebbieħa tal-Premju tal-UE għall-Ġurnalisti fil-Qasam tas-Saħħa 2011. L-artikli eċċezzjonali tagħhom intgħażlu minn fost kważi 500 artiklu sottomessi minn ġurnalisti mis-27 Stat Membru tal-UE.
L-ewwel premju ngħata lil tim ta' żewġ ġurnalisti Brittanniċi, Ben Hirschler u Kate Kelland, li jiktbu għal 'Reuters', għall-artiklu tagħhom li juri għaliex ir-reżistenza għall-mikrobi hi importanti – hi kwsitjoni ta' ħajja jew ta' mewt meta l-mediċini ma jkunux jistgħu joqtlu lill-mikrobi.
Il-ġurnalista Ungeriża Rita Makarész, ingħatat it-tieni premju għall-artiklu tagħha dwar il-benefiċċji tal-eżerċizzju għall-persuni li jbatu mid-dipressjoni, li kien ippubblikat fuq il-portal tas-saħħa www.orvostkeresek.hu.
It-tielet premju mar għand il-ġurnalista Slovena Mateja Grošelj, għall-artiklu tagħha ppubbliakt f'"Vecer Weekly", li jitkellem dwar mara li ġġieldet il-kanċer tas-sider u l-esperjenza tagħha ta' operazzjoni għar-rikostruzzjoni tas-sider.
Din is-sena, iddeċidejt li nagħti premju speċjali għall-aqwa artiklu dwar il-waqfien mit-tipjip. It-tipjip hu l-kawża ewlenija ta' mard li jista' jiġi evitat fl-Ewropa, u jqassar il-ħajja ta' mijiet ta' eluf ta' Ewropej kull sena. Hu għalhekk li jien iddeterminat li niżgura li l-Ewropej ikunu konxji dwar x'jikkawża t-tabakk f'ħajjithom. Dan il-premju ġdid iħeġġeġ id-dibattitu dwar din il-kwistjoni.
Dan il-premju speċjali mar għand Monika Cetera mill-Polonja għall-artiklu tagħha li laqat il-musmar fuq rasu billi ddettaljat l-effet negattivi mhux daqshekk magħrufa tat-tipjip – is-saħħa orali, ippubblikat fuq www.jaw.pl.
Nixtieq nawgura wkoll lill-finalisti nazzjonali u nirringrazzja lill-Ġuriji Nazzjonali, il-ġurija tal-UE, ir-rappreżentanzi tal-Kummissjoni fl-Istati Membri u s-servizz tat-traduzzjoni tal-Kummissjoni, li lkoll ikkontribwew għas-suċċess ta' dan il-premju.