Hekk kif qed noqorbu lejn l-istaġun tal-festi tal-Milied fl-Ewropa, forsi nqarrsu wiċċna meta nsemmu l-alkoħol bħala "uġigħ ta' ras" għal bosta Stati Membri. Iżda hu eżempju tajjeb ta' kwistjoni soċjali fejn nistgħu nitgħallmu ħafna minn xulxin.
Dan kien il-ħsieb wara l-Forum Ewropew dwar l-Alkoħol u s-Saħħa, u għal dawn l-aħħar erba' snin ippresedejt il-Grupp Xjentifiku li jipprovdi l-forum b'opinjonijiet xjentifiċi. Qabel, pereżempju, ħarisna lejn l-evidenza tal-impatt tal-marketing tal-alkoħol u kkonkludejna li jista' jinfluwenza l-età ta' meta ż-żgħażagħ jibdew jixorbu u l-ammont li jixorbu meta jibdew.
L-iktar rapport reċenti kien dwar is-suġġett kruċjali tal-alkoħol u l-post tax-xogħol fl-Ewropa. Il-post tax-xogħol jipprovdi kemm theddida u kemm opportunità. It-theddida lill-impjegati hi telfa ewlenija ta' produttività permezz ta' inċidenti, l-assenteiżmu u l-'preżenteiżmu' (l-istaff ikun preżenti fuq il-post tax-xogħol iżda ma jipproduċix tajjeb minħabba problemi tal-alkoħol). L-impatt mhuwiex biss fuqu nnifsu iżda wkoll fuq dawk ta' madwaru.
L-opportunità hi li nużaw il-post tax-xogħol biex nidentifikaw il-ħaddiema bil-problemi minħabba x-xorb (avolja x-xorb ma jseħħx waqt il-ħin tax-xogħol) u nintervjenu kmieni biex nappoġġawhom bi strateġiji ta' ġestjoni effettivi. Ir-rapport enfasizza dak li jaħdem, iżda wkoll id-dgħjufijiet biex programmi ta' ħidma futuri jkunu iktar effettivi u evalwati prospettivament. Irridu naħdmu mhux għal kontinent bla alkoħol iżda għal kontinent ħieles mill-ħsara relatata mal-alkoħol.