It-Tieni Programm tal-Unjoni Ewropea dwar is-Saħħa (2008-2013) hu strument biex tiġi implimentata l-Istrateġija tal-UE dwar is-Saħħa "Flimkien għas-Saħħa", sabiex tkun protetta s-saħħa taċ-ċittadini llum u fil-ġejjieni.
Hu għandu tliet għanijiet: li jtejjeb is-sigurtà tas-saħħa taċ-ċittadini, li jippromwovi s-saħħa – inkluż it-tnaqqis tal-inugwaljanzi fis-saħħa – u li jiġġenera u jxerred l-informazzjoni dwar is-saħħa. Il-Programm tas-Saħħa hu mmanniġġjat mill-Kummissjoni Ewropea u mill-Aġenzija Eżekuttiva għas-Saħħa u l-Konsumaturi.
F'nofs triqtu l-Programm diġà ffinanzja madwar 230 azzjoni, fosthom proġetti, azzjonijiet konġunti, għoti ta' flus biex l-NGOs ikunu jistgħu jaħdmu u konferenzi. Il-biċċa l-kbira għadhom għaddejjin, iżda ħafna oħrajn diġà kellhom riżultati importanti għas-saħħa pubblika.
Pereżempju, il-proġett SHIPSAN-TRAINET qed isaħħaħ l-abbiltà tal-UE li ma tħallix li jkun hawn mard li jittieħed u li tkun tista' tikkontrollah fuq bastimenti li jġorru l-passiġġieri. Inkiteb manwal li attwalment qed jintuża bħala mudell għall-iżvulupp ta' standards Ewropej kemm għal verifiki ta' sikurezza, kif ukoll għal skopijiet ta' taħriġ.
Il-proġett ORPHANET waqqaf il-portal ta' referenza tal-UE għal informazzjoni dwar mard rari u dwar mediċini orfni. Il-pazjenti u l-professjonisti għandhom aċċess għal direttorju ta' servizzi speċifiċi, fosthom kliniki speċjalizzati, laboratorji mediċi, proġetti ta' riċerka li għadha għaddejja, verifiki kliniċi, reġistri, netwerks, pjattaformi teknoloġiċi u organizzazzjonijiet tal-pazjenti. ORPHANET tant irnexxa li l-Ġappun u l-Brażil qed jittraduċu l-portal biex isir użu minnu mis-servizzi tas-saħħa tagħhom.
L-azzjoni EPAAC qed tlaqqa' flimkien lill-partijiet kollha interessati mill-marda tal-kanċer (ir-riċerka, id-djanjosi, il-kura) ħalli jippreparaw strateġija komuni sabiex jiġġieldu l-kanċer fl-Ewropa. L-EPAAC diġà wettqet analiżi komparattiva iddettaljata tal-Pjanijiet Nazzjonali dwar il-Kanċer li jeżistu bħalissa, biex jiġu identifikati l-aħjar prattiki u s-sinerġiji potenzjali ħalli jittejbu d-djanjosi u l-kura tal-kanċer.
Meta jitqiesu dawn is-suċċessi u li ħafna azzjonijiet ta' kwalità se jiġu ffinanzjati matul it-tieni parti tal-Programm, ninsabu fiduċjużi li l-Programm tal-UE dwar is-Saħħa għandu jissodisfa l-għanijiet tiegħu li titjieb is-saħħa taċ-ċittadini tal-UE.
