Liż-żgħażagħ ngħidulhom biex igawdu ż-żgħożija billi dawn huma l-aħjar snin ta' ħajjithom. Iżda ħafna żgħażagħ fl-Ewropa, qed isibu dejjem iktar diffikultajiet minħabba l-pressjonijiet ta' kuljum tal-eżamijiet, tar-relazzjonijiet u tat-tiftix tax-xogħol.
Għalkemm huma l-iktar ġenerazzjoni b'edukazzjoni għolja, iż-żgħażagħ tal-lum isibuha dejjem iktar diffiċli li jagħmlu t-transizzjoni mill-iskola għax-xogħol. F'April 2011, Eurostat irrapporta li r-rata ta' qgħad taż-żgħażagħ kienet ta' 19,6% fl-UE, iktar mid-doppju minn dik tal-popolazzjoni adulta.
Livelli għoljin hekk ta' qgħad għandhom konsegwenzi soċjali u għas-saħħa. Il-WHO tammetti li f'dawn l-aħħar snin kien hemm żieda fil-problemi tas-saħħa mentali fost iż-żgħażagħ fl-Ewropa, inkluż ansjetà, depressjoni, disturbi marbuta mal-ikel u ħsara lilhom infushom.
Hemm nuqqas ta' dejta speċifika dwar iż-żgħażagħ u s-saħħa mentali, iżda WHO-Europa stmat li minn 10 sa 20% taż-żgħażagħ ibgħatu minn kwistjonijiet marbuta mas-saħħa mentali, (b'perċentaġġ ogħla fost iż-żgħażagħ żvantaġġati u l-migranti). Pressjonijiet soċjali ikbar, bħall-inkwiet finanzjarju u ta' impjieg, jistgħu jikkawżaw problemi tas-saħħa mentali jew iżidu problemi diġà eżistenti. B'hekk, hekk kif il-kriżi tal-impjiegi fost iż-żgħażagħ tkompli, is-sitwazzjoni tas-saħħa mentali taż-żgħażagħ fl-Ewropa probabilment tmur għall-agħar.
L-UE iffukat sew fuq kwistjonijiet tas-saħħa mentali, bil-Patt Ewropew għall-Benessri u s-Saħħa Mentali fl-2008, u l-konferenza ta' Settembru 2009 "Il-promozzjoni tas-saħħa mentali u l-benessri fit-tfal u ż-żgħażagħ - nagħmluha possibbli" li kienet organizzata mill-Kummissjoni Ewropea u l-Ministeru tas-Saħħa u l-Affarijiet Soċjali Svediż flimkien bl-appoġġ tal-Forum taż-Żgħażagħ Ewropej. Iktar reċentement, il-Kunsill tal-UE rrikonoxxa l-kwistjonijiet urġenti tas-saħħa mentali fl-Ewropa, b'sejħa għal riċerka u ħidma kontinwa.
L-impenn kontinwu tal-UE fil-kwistjonijiet tas-saħħa mentali huwa merħba, iżda hemm bżonn spinta ġdida ta' kooperazzjoni u determinazzjoni min dawk li jfasslu l-politika, l-professjonijisti tas-saħħa u l-organizzazzjonijiet tas-soċjetà ċivili biex jiġġieldu x-xejra tas-saħħa mentali li qed tmur għall-agħar fost iż-żgħażagħ.