Fil-31 ta' Mejju, il-Jum Dinji Mingħajr Tabakk ta' din is-sena se jiffoka fuq il-Konvenzjoni Qafas dwar il-Kontroll tat-Tabakk tal-Organizzazzjoni Dinjija tas-Saħħa, trattat internazzjonali komprensiv innegozjat taħt l-awspiċi tad-WHO, adottat f'Mejju 2003 u fis-seħħ minn Frar 2005. Il-firmatarji tal-FCTC – s'issa 'l fuq minn 170 pajjiż – jaqblu li jieħdu miżuri effettivi biex jipproteġu lin-nies mill-konsum tat-tabakk.
L-UE kienet strumentali fl-iżvilupp tal-FCTC u ħalliet impatt fuq ħafna mid-dispożizzjonijiet tagħha. Ġibna magħna ħafna esperjenza u prattiki tajba madwar il-mejda, iżda ninsabu wkoll ħerqanin li nitgħallmu minn metodi, politiki u liġijiet ta' pajjiżi oħrajn. Dejjem nistgħu nagħmlu aħjar.
Pereżempju, id-Direttiva dwar il-Prodotti tat-Tabakk tagħna tfasslet biex ikunu armonizzati bosta fatturi ta' dawn il-prodotti għall-Ewropa kollha filwaqt li jiġi żgurat livell għoli ta' protezzjoni tas-saħħa. Id-Direttiva kienet pass fid-direzzjoni t-tajba, iżda ilha 10 snin u qed tiqdiem. Bosta mill-mistoqsijiet li niffaċċjaw illum il-ġurnata ma kinux jitqiesu kwestjonabbli fl-2001. Pereżempju, kif nittrattaw it-tabakk ġdid bla duħħan jew il-prodotti tan-nikotina, flimkien mal-bejgħ fuq l-internet, jew it-togħmiet u l-ingredjenti li jagħmlu t-tabakk attraenti għaż-żgħażagħ?
Il-kontroll tat-tabakk jiħtieġlu strateġija fuq ħafna livelli – il-leġiżlazzjoni hi importanti ħafna iżda jiħtiġilna wkoll l-edukazzjoni, l-informazzjoni u l-ħolqien ta' għarfien: Kampanja attiva fl-UE biex ikun evitat u jitnaqqas l-użu tat-tabakk hi kruċjali. Il-kampanja preċedenti tal-UE, HELP (2005 10), iffukat fuq il-prevenzjoni tat-tipjip fost iż-żgħażagħ. Din is-sena, ser inniedu kampanja ġdida biex ninkuraġġixxu lill-persuni bl-età bejn il-25 u l-34 sena biex ma jkomplux ipejpu. Il-kampanja l-ġdida minflok ma qed tiffoka fuq il-perikli tat-tipjip qed tinsisti fuq il-vantaġġi fiżiċi, mentali u finanzjarji li wieħed jakkwista meta jieqaf mit-tipjip.
L-għan tagħna hu li nirnexxu fil-kontroll tat-tabakk, għas-sikurezza u l-benesseri taċ-ċittadini tagħna, biex l-Ewropa tkun aktar b'saħħitha u biex inkunu leħen strumentali fil-politika dinjija tas-saħħa dwar il-kontroll tat-tabakk.
