Raġel Ġermaniż avvanzat fiż-żmien li jbati bid-dijabete li jkun sejjer għal żjara fl-Italja jieħu miegħu ftit riċetti tat-tobba żejda, iżda l-ispiżjar jaċċettahomlu? Mara Pollakka għandha bżonn tagħmel operazzjoni f'ġenbejha u tippreferi tagħmel dan fil-pajjiż fejn jgħixu n-neputijiet tagħha, iżda kif tista' torganizza dan kollu mill-Polonja? Raġel Portugiż jixtieq jagħmel l-operezzjoni tal-katarretti għand speċjalist fi Spanja, iżda jista' jiġi rimborżat?
Dawn mhumiex ħlief ftit eżempji għalfejn huma meħtieġa regoli ċari u koerenti dwar il-kura tas-saħħa bejn il-pajjiżi.
Liġi ġdida tal-UE dwar id-drittijiet tal-pazjenti fil-kuntest tal-kura tas-saħħa bejn il-fruntieri dalwaqt se tiġi adottata. Din għandha tiċċara d-drittijiet tal-pazjenti għal kura sikura u ta' kwalità tajba f'pajjiżi oħra tal-UE, u li tista' tiġi rimborżata. Il-pazjenti li jivvjaġġaw f'pajjiż ieħor tal-UE għal kura medika se jgawdu minn trattament ugwali daqslikieku huma ċittadini tal-pajjiż fejn ikunu qed jieħdu l-kura.
Din il-liġi l-ġdida se tibbenefika l-pazjenti tal-UE b'għadd ta' modi oħra wkoll. Din se:
- Tagħmilha aktar faċli biex l-awtoritajiet nazzjonali tas-saħħa jaħdmu iktar mill-qrib bejniethom u biex ipartu l-informazzjoni dwar standards ta' kwalità u ta' sikurezza fil-kura tas-saħħa.
- Tipprovdi għajnuna lill-pazjenti li għandhom bżonn kura speċjalizzata, pereżempju pazjenti li jbatu minn mard rari.
- Tippromwovi r-rikonoxximent tar-riċetti tat-tobba fl-UE kollha.
- Tgħin toħloq Netwerks Ewropej ta' Referenza, li jlaqqgħu flimkien ċentri speċjalizzati u jippermettu lill-esperti fl-Ewropa jaqsmu l-aħjar eżempji dwar il-kura tas-saħħa u jiżviluppaw standards ta' eċċellenza.
B'din il-liġi ġdida, sa fl-aħħar se jiġu indirizzati għexieren ta' snin ta' inċertezza legali dwar il-kura tas-saħħa bejn il-fruntieri.
