Kull sena, 150 miljun Ewropew jivvjaġġaw lejn pajjiż ieħor tal-Unjoni Ewropea għal xogħol jew għal btala. Iżda 65% minnhom iħossuhom inqas sikuri meta jkunu barra minn pajjiżhom. Hawn iktar minn 60 numri ta' emerġenza fl-UE, iżda wieħed biss jagħtik il-possibbiltà li taqbad is-servizzi tal-emerġenza kollha (tifi tan-nar, puliżija, ambulanza) direttament u bla ħlas fil-pajjiżi membri kollha: 112.
95% taċ-ċittadini Ewropej jaqblu dwar l-utlità ta' numru ta' emerġenza wieħed li jaħdem kullimkien fl-UE. In-numru 112 kien mitlub miċ-ċittadini. Immaġina li tinqalalek emerġenza barra minn pajjiżek u ma tkunx tista' tiftakar in-numru/i ta' emerġenza nazzjonali. Tippanikjax, kull fejn tkun fl-UE, tista' ċċempel in-numru Ewropew għal sejħiet ta' emerġenza.
Tista' ċċempel 112 minn telefown fiss, inklużi dawk bil-ħlas, jew minn mowbajls. Dejjem bla ħlas u jaħdem 24 siegħa kuljum, 7 ijiem fil-ġimgħa. Għadd ta' pajjiżi barra mill-UE u barra mill-Ewropa qed jibdew jużaw il-112. Fl-Istati Uniti wkoll, jekk iċċempel 112 minn mowbajl, it-telefonata tiġi kkunsidrata bħala 911.
Sfortunatament, ftit ċittadini huma konxji min-numru Ewropew għal sejħiet ta' emerġenza. Fl-2010, 25% tal-Ewropej biss setgħu jidentifikaw il-112 bħala numru validu madwar l-UE kollha. "112 huwa serviżż għaċ-ċittadini Ewropej kollha: vera dnub li ma jafux bih. Flimkien għandu jirnexxilna nagħmlu dan in-numru magħruf minn kull ċittadin Ewropew," qal Emmanuel Paul, il-president tal-Fondazzjoni 112, fondazzjoni bbażata fi Brussell iddedikata għall-promozzjoni tan-numru Ewropew għal sejħiet ta' emerġenza. "Kull sena, fil-11 ta' Frar infakkru il-Ġurnata Ewropea 112: Ippromwovu l-112 dakinhar"