Nixtieq nippromwovi approċċ tul il-ħajja għax-xjuħija. Dan huwa
kunċett ewlieni fl-istrateġija dwar is-saħħa tal-UE – Flimkien għas-Saħħa – u
jiffoka fuq li nibqgħu b'saħħitna u ngawdu l-ħajja għal kemm jista' jkun
żmien.
L-Ewropa qed tixjieħ minħabba rata ta' twelid baxxa u stennija
tal-ħajja itwal. Hekk kif tkompli din ix-xejra, is-soċjetà tagħna se tinbidel.
Hemm bżonn li naġixxu issa biex nippjanaw u nadattaw għal din il-bidla. Dan
jinvolvi l-istudju ta' modi ta' kif is-sostenibbiltà finanzjarja tas-sistemi
tas-saħħa tiżdied. Iktar investiment fil-prevenzjoni u l-enfasi fuq
il-benefiċċji ta' stil ta' ħajja b'saħħitha huma parti ċara mis-soluzzjoni.
L-użu tat-teknoloġiji l-ġodda għall-prevenzjoni huwa qasam b'ħafna
potezjal.
L-UE nediet azzjonijiet biex ittejjeb is-saħħa tal-anżjani. Qed
niffukaw fuq azzjonijiet li jġibu l-innovazzjoni u l-progress f'oqsma bħal:
is-saħħa-e, il-valutazzjoni tat-tekonoloġija tas-saħħa, it-telemediċina,
il-mediċina personalizzata. Pereżempju ix-xogħol fuq mard newro-deġenerattiv
bħall-Alzheimers fejn qed naqsmu r-riżorsi u l-kompetenzi minn madwar l-Ewropa
biex nippruvaw insibu kura iktar malajr.
Iktar snin b'saħħa tajba jfisser kwalità tal-ħajja aħjar, iktar
indipendenza u l-possibbiltà li nibqgħu attivi fiżikament u soċjalment.
Naħseb li qed ngħixu fi żmien interessanti, fejn
opportunitajiet ġodda, permezz tat-teknoloġiji, ir-riċerka u l-innovazzjoni,
jistgħu jirrivoluzzjonaw is-sistemi tas-saħħa. Madanakollu, għandna bżonn ukoll
nirrivoluzzjonaw il-mod kif naħsbu dwar ix-xjuħija. Il-Kummissjoni Ewropea
nnominat l-2012 bħala s-sena tax-xjuħija attiva. Nistieden lill-qarrejja biex
jaħtfu din l-opportunità u jinvolvu ruħhom f'attivitajiet ippjanati għal dik
is-sena.
