Id-donazzjonijiet tad-demm u l-plasma tal-bniedem jiffurmaw
bażi għal firxa wiesgħa ta' terapiji essenzjali li ħafna drabi jsalvaw
il-ħajja. Id-demm u l-komponenti tiegħu jintużaw ukoll fl-operazzjonijiet u
t-terapiji biex itejbu l-kwalità tal-ħajja ta' eluf ta' pazjenti kuljum.
Din il-kura, ibbażata fuq id-demm u l-komponenti tiegħu,
tiddependi fuq il-volontà tal-persuni li jagħtu d-demm. Lkoll kemm aħna nistgħu
nkunu donaturi biex nipprovdu dan ir-rigal lin-nies ta' madwarna. Madankollu,
hemm biss medja ta' 4% ta' donaturi attivi tad-demm fil-popolazzjoni.
Inizjattivi bħall-Jum Dinji tad-Donaturi tad-Demm għandhom
l-għan li jiċċelebraw dan l-att ta' solidarjetà, u jqajmu kuxjenza li jekk
nagħtu d-demm nistgħu nkunu parti mis-soluzzjoni ta' bżonn kbir ta' demm. Se
jiġu organizzati ħafna avvenimenti fl-Ewropa u madwar id-dinja, din is-sena
b'enfasi speċjali fuq id-donaturi żgħażagħ, li jistgħu jipprovdu "demm ġdid
lid-dinja".
Madankollu ma nistgħux ninsew li d-demm hu prezzjuż u għandu
jiġi rispettat. Id-demm m'għandux "jinħela" – għandhom jitqiesu
l-alternattivi terapewtiċi kollha qabel ma ssir trasfużjoni, anke jekk ta'
unità waħda biss ta' demm.
L-UE ntrabtet li tiżgura l-kwalità u s-sikurezza tad-demm
għat-trasfużjoni permezz ta' strumenti legali u politiki differenti. B'hekk
tikkontribwixxi biex kull donazzjoni tfisser benefiċċju għall-pazjenti.