Dan huwa l-ewwel editorjal tiegħi tan-Newsletter minn mindu
nħtart Direttur Ġenerali tad-Direttorat tas-Saħħa u l-Konsumatur. Nixtieq nibda
billi nagħti merħba speċjali lill-qarrejja tagħna kollha.
Waħda mill-prijoritajiet tiegħi hi li titjieb is-saħħa ta' dawk
kollha li jgħixu fl-UE. Iżda jinteressawni wkoll il-kwestjonijiet dwar is-saħħa
barra mill-UE. Għalfejn? Il-promozzjoni tal-valuri tal-UE u l-mudell tal-UE
jimplikaw li għandna rwol fundamentali biex ngħinu ntejbu s-saħħa tan-nies
kollha, jgħixu fejn jgħixu. Fuq livell prattiku, ħafna riskji għas-saħħa –
it-tibdil fil-klima, l-influwenza pandemika jew it-tabakk pereżempju – jistgħu
jkunu ġestiti effettivament biss permezz ta' azzjoni globali.
Il-Kummissjoni nediet inizjattiva ġdida dwar is-saħħa madwar
id-dinja biex tikkontribwixxi għal titjib fis-saħħa fid-dinja, tnaqqas
l-inugwaljanza fis-saħħa u tipproteġi kontra theddid globali għas-saħħa. Din se
titmexxa mid-Direttorat tas-Saħħa u l-Konsumatur u d-Direttorat tal-Iżvilupp u
r-Riċerka. Il-punti ewlenin tal-inizjattiva qegħdin fid-
Dokument ta' politika tal-Kummissjoni dwar ir-rwol tal-UE fis-saħħa madwar
id-dinja adottat f'Marżu 2010.
Se noħolqu sħubija iktar b'saħħitha ma' pajjiżi barra mill-UE u
organizzazzjonijiet internazzjonali, bl-użu ta' fondi għall-kooperazzjoni u
r-riċerka għall-iżvilupp, u se neżaminaw kif politiki oħra tal-UE bħall-kummerċ
jistgħu jikkontribwixxu għall-miri relatati mas-saħħa.
Bejn l-10 u l-11 ta' Ġunju, il-Kummissjoni se torganizza
konferenza dwar is-saħħa madwar id-dinja fi Brussell. Se nagħmlu wkoll serje
ta' skambji f'pajjiżi barra mill-UE.
F'Ġunju il-Kummissarju Ewropew John Dalli responsabbli
mill-Politika dwar is-Saħħa u l-Konsumatur flimkien ma' rappreżentanti
tad-Direttorat Ġenerali tiegħi se jżuru ċ-Ċina u jiltaqgħu ma' uffiċjali Ċiniżi
u jattendu avvenimenti marbuta mal-Expo Dinjija ta' Shangai. It-tema tal-Expo
hija "belt aħjar, ħajja aħjar". Bil-preżenza tagħna, nisperaw li
nistgħu "intejbu s-saħħa"!