L-EMSP u l-MSIF, iż-żewġ organizzazzjonijiet li jikkoordinaw
l-azzjoni kontra l-isklerożi multipla (SM) fl-Ewropa u f'pajjiżi oħra,
jippromwovu inizjattivi madwar id-dinja kollha fl-okkażjoni tal-Jum Dinji
tal-SM fis-26 ta' Mejju. It-tema ta' din is-sena hija l-impjieg. Riċerka ġdida
kkummissjonata mill-MSIF turi li t-telf tal-impjieg hu wieħed mill-konsegwenzi
ekonomiċi ewlenin tal-SM. Ħafna persuni li jbatu mill-SM jiffaċċaw
diskriminazzjoni fuq il-post tax-xogħol jew jitilfu l-impjieg tagħhom minħabba
li l-marda mhijiex magħrufa sew. Għaldaqstant, stħarriġ tal-MSIF
dwar l-SM u l-impjieg wera li tibdil sempliċi bħal ħin tax-xogħol
flessibbli, jista' jgħin lil dawn il-persuni jibqgħu attivi għal żmien
itwal.
Fl-Ewropa, 80 minn 100,000 persuna jbatu mill-SM. L-età medja
meta titfaċċa l-marda hi ta' 29 sena. Ħafna minn dawn il-persuni jkunu għadhom
fil-bidu tal-karriera tagħhom meta jiġu djagnostikati bil-marda u jsibu li
l-isklerożi multipla taffettwa ħafna l-kapaċità tagħhom biex jaħdmu meta jkunu
għadhom fl-aqwa żmien ta' ħajjithom. In-nisa, li għandhom tliet darbiet iktar
probabbiltà li jiżviluppaw il-marda, huma dawk li jbatu l-iktar. Mhux faċli li
l-mara ssib bilanċ bejn il-marda, l-impjieg u l-maternità.
Is-sena l-oħra ħarġet iktar informazzjoni dwar dawn
il-kwistjonijiet permezz tal-proġett pilota għal Reġistru Ewropew tal-SM
mill-“Multiple sclerosis
information dividend”. Dan il-proġett, li spiċċa reċentement, kien
kofinanzjat mill-programm dwar is-saħħa pubblika tal-Kummissjoni Ewropea.
Fil-Jum Dinji tal-SM se jsiru attivitajiet relatati mal-impjieg
fl-Ewropa u f'pajjiżi oħra. Dawk li jgħixu bil-marda jixtiequ jqajmu kuxjenza
dwar il-marda biex jistimulaw il-finanzjament għar-riċerka u t-trattament.
Bosta organizzazzjonijiet qed jittamaw li jiġbdu l-attenzjoni tal-fassala
tal-politika li jistgħu jiżguraw li drittijiet tagħhom tal-ugwaljanza u
n-nuqqas ta' diskriminazzjoni jiġu rispettati skont il-Konvenzjoni tan-NU dwar
id-drittijiet tal-persuni b'diżabbiltà.
