Matul l-aħħar għaxar snin, il-każ – kemm morali u ekonomiku –
biex jiġu ttrattati l-inugwaljanzi fis-saħħa bejn u fost il-pajjiżi tal-UE
nbena b’mod formidabbli. Il-programmi ta’ azzjoni tal-UE dwar is-saħħa pubblika
appoġġaw il-ħidma li tidentifika l-evidenza u l-iżvilupp ta’ strateġiji/miżuri
speċifiċi biex dan ikun jista’ jsir.
Id-dokument "Solidarjetà fis-saħħa" tal-2009
tal-Kummissjoni Ewropea jagħmel sforz biex jgħaqqad flimkien it-taħlita
kumplessa ta’ politika u prattika meħtieġa biex jiġu indirizzati l-problemi
b’mod effettiv.
Presidenzi suċċessivi tal-UE wrew għarfien li qed jiżdied
mill-gvernijiet dwar il-firxa tal-problema, prekursur importanti biex jinsabu
soluzzjonijiet, bil-presidenza Spanjola attwali tinkuraġġixxi b’mod attiv passi
prattiċi, b’mod partikulari biex jiġu kkalkulati u mifhumin il-ħtiġijiet.
Din il-kwistjoni tmur lil hinn mis-sistemi tas-saħħa, għalkemm
il-ħtieġa li dawn jiġu orjentati mill-ġdid b'mod sistematiku lejn
il-prevenzjoni tal-mard u l-promozzjoni tas-saħħa/tal-benesseri hi parti vitali
tas-soluzzjoni, tal-anqas bħala tweġiba kruċjali għall-kriżijiet ekonomiċi u
soċjali prinċipali billi qed jiġu stabbiliti l-prijoritajiet għall-istrateġija
Ewropa 2020.
L-istituzzjonijiet tal-UE għandhom rwol fundamentali fiha.
L-aspirazzjoni ta’ min ifaħħarha tal-UE fit-Trattat ta’ Liżbona li “jiġi
promoss [ … ] il-benesseri taċ-ċittadini tagħha” jinħtiġilha tinbidel f'azzjoni
li tindirizza l-fatturi determinanti soċjali, ekonomiċi u ambjentali:
il-"kawżi tal-kawżi" ta' nuqqas ta’ saħħa. B’hekk biss inkunu nistgħu
nibdew nittrattaw il-problema.