Teżisti prevenzjoni mit-tuberkulożi (TB), u grazzi
għall-medikazzjoni vvintata 50 sena ilu, teżisti kura għaliha. Iżda sal-ġurnata
tal-lum fl-Ewropa, kull siegħa, jimirdu biha 49 persuna u jmutu 7.
Ir-raġunijiet għalfejn il-pajjiżi Ewropej għad ma rnexxilhomx
jeqirdu t-TB huma magħrufa sew: ir-reżistenza persistenti tal-marda kontra
l-mediċini, il-preżenza tat-TB fil-popolazzjonijiet vulnerabbli, iż-żieda
tal-infezzjonijiet magħquda li jinvolvu l-HIV u t-TB, eċċ.
L-organizzazzjonijiet non-governattivi għandhom rwol ewlieni
fil-prevenzjoni tat-TB, għall-kura tal-vittmi u għall-qerda tal-marda. Għandhom
kuntatti mill-qrib mal-atturi fil-livelli kollha – il-gvern, id-dinja medika,
il-popolazzjonijiet f'riskju – u għandhom esperjenza prezzjuża fil-qasam.
L-organizzazzjoni tagħna tiddisinja u timplimenta proġetti
tal-għajnuna soċjali għall-persuni li jippreżentaw reżistenza għal diversi
mediċini kontra t-TB. Dan l-aħħar konna attivi fil-Moldova, pajjiż li ntlaqat
minn xokk soċjali qawwi wara l-waqgħa tal-Unjoni Sovjetika. L-NGO Carlux hi
s-suċċessur għall-programm TB/HIV fil-ħabsijiet imniedi fl-1999 bl-appoġġ
finanzjarju tal-Caritas tal-Lussemburgu. Il-missjoni tagħna hi li nnaqqsu
l-infezzjonijiet u l-imwiet mit-TB/HIV permezz ta' attivitajiet sportivi,
il-bini tal-kapaċità tal-istituzzjonijiet ċivili u penitenzjarji u t-titjib
fil-kundizzjonijiet tal-kura f'dawn l-istituzzjonijiet.
Kellna l-unur naraw ħidmietna u l-kontribuzzjoni tagħna
rikonoxxuti mill-premju Ewropew KE/ECDC/WHO-Ewropa 2009 għall-NGOs li jiġġieldu
kontra t-TB.
Lil hinn mis-sodisfazzjon personali, dan il-premju hu
partikolarment importanti għax jenfasizza l-kontribuzzjoni mogħtija mill-NGOs.
Ir-rikonoxximent u l-appoġġ tal-ħidma ta' dawn l-organizzazzjonijiet jagħtu
spinta lill-isforzi konġunti tagħna biex neqirdu t-TB darba għal dejjem.
