Dan l-ewwel ta’ Diċembru, se nkunu qed nikkommemoraw il-jum dinji tal-AIDS, bis-saħħa tal-mobilizzazzjoni tal-entitajiet li qed jaħdmu mal-persuni seropożittivi jew minħabba li l-HIV/AIDS hi parti ta’ kuljum minn ħajtek jew ta’ xi ħadd li jiġi minnek.
Iċ-ċelebrazzjoni tal-jum dinji tal-AIDS hi kontradittorja kemm bħala sors ta’ tama kif ukoll bħala preokkupazzjoni.
Tama meta sirna nafu li fl-Ewropa tal-Lvant il-kopertura għall-prevenzjoni mill-omm għat-tarbija taqbeż il-95% u li dawn il-pajjiżi jistgħu jeliminaw din it-trażmissjoni sal-2015; jew meta nafu li 4 miljuni qed jieħdu mediċini anti-retrovirali u li l-programmi ta’ prevenzjoni juru l-effikaċja tagħhom, diversi pajjiżi fl-Afrika u fl-Ażja kellhom tnaqqis fil-prevalenza.
Ta’ preokkupazzjoni għaliex jinħtiġilna nżommu d-dinamika fl-istess waqt li għaddejjin minn kriżi ekonomika maġġuri u li l-ġvernijiet għandhom jiffaċċjaw problemi oħra emerġenti.
Jeżisti dejjem nuqqas serju ta’ riżorsi u l-istigmatizzazzjoni li tingħata lill-Aids għadha importanti ħafna.
Attwalment, meħtieġ li jinżammu l-wegħdiet li saru, inkluż it-tkomplija tal-għan tal-Millennju għall-iżvilupp: minn issa sal-2015, li jitwaqqaf it-tixrid tal-HIV/AIDS hu minn qabel indispensabbli għall-implimentazzjoni tal-parti l-kbira tal-għanijiet l-oħrajn.
Illum il-ġurnata aktar minn 33 miljun persuna huma seropożittivi u għal kull żewġ persuni li tinbdilhom il-kura, ħamsa oħra huma infettati mill-ġdid.
Għandna nżidu l-impatt tal-attivitajiet ta’ prevenzjoni tal-HIV; fejn il-programmi ta’ prevenzjoni mhumiex adattati għall-persuni l-aktar vulnerabbli għar-riskju ta’ infezzjoni, ir-rati ta’ infezzjoni baqgħu stabbli jew reġgħu bdew jiżdiedu.
L-investiment importanti li ngħata dawn l-aħħar snin mill-Kummissjoni Ewropea għandu, flimkien mal-imsieħba tagħha, jimmira lejn żewġ miri prinċipali: l-ewwel, għandna niftakru li fl-2006 l-Istati kollha impenjaw lilhom innifishom li jilħqu l-aċċess universali ta’ prevenzjoni, tat-trattament, u tal-kuri sal-aħħar tal-2010. Imbagħad flimkien għandna naħsbu għal strateġija fit-tul biex nimmaniġġjaw l-epidemija li se tkun magħna fid-deċennji li ġejjin.
