Is-CPME laqa' bil-ħerqa l-Jum Dinji tas-Saħħa Mentali bħala mezz biex jippromwovi s-saħħa mentali u biex issir prijorità madwar id-dinja. It-tema ta' din is-sena tqiegħed lis-saħħa mentali fil-qalba tal-kura primarja.
Illum, hu stmat li madwar 11% tal-popolazzjoni tesperjenza disturbi mentali, li sal-2020 jaf ikunu l-kawża ewlenija ta' inkapaċità għax-xogħol. Bħalissa, id-dipressjoni diġà hi l-iktar problema tas-saħħa prevalenti f'bosta pajjiżi tal-UE.
Hu kruċjali li jiġi enfasizzat li s-saħħa mentali mhijiex biss fundamentali għal saħħa ġenerali u kwalità tal-ħajja tajba, iżda hi importanti wkoll għall-produttività u l-kapaċità tax-xogħol u b'hekk għall-iżvilupp sostenibbli tal-Ewropa.
Din hi sena importanti għas-saħħa mentali fl-Ewropa minħabba l-ewwel passi lejn l-implimentazzjoni tal- Patt Ewropew għas-Saħħa Mentali u l-Benessri u se jiġu organizzati konferenzi tematiċi appoġġati mill-Kummissjoni.
It-tobba u speċjalment dawk fil-kura primarja għandom rwol importanti li għandu jkun imsejjes fuq taħriġ tajjeb, ħiliet kliniċi u disponibilità ta' servizzi psikjatriċi effettivi. Il-metodu integrat jipprova jagħmel is-servizzi u l-professjonisti iktar disponibbli għaċ-ċittadini kollha tal-UE. Flimkien ma' miżuri preventivi, dan għandu jikkontribwixxi biex l-impenn tal-Ewropa għas-solidarjetà u l-ġustizzja soċjali jsir wegħda sostenibbli.