Għal bosta snin, il-Jum Dinji tal-Alzheimer fil-21 ta’ Settembru serva ta’ opportunità għall-assoċjazzjonijiet tal-Alzheimer biex jipprovaw jinfluwenzaw lil dawk li jieħdu d-deċiżjonijiet biex jirrikonoxxu l-impatt fuq is-saħħa pubblika tad-dimenzja fuq is-sistemi Ewropej kollha tas-saħħa.
Fl-2009, nistgħu nħarsu lura lejn is-sena li għaddiet u niċċelebraw il-ħafna twettiq u ż-żieda fl-għarfien tad-dimenzja bħala prijorità Ewropea għas-saħħa pubblika.
F'Lulju, il-Kummissjoni Ewropea adottat inizjattiva dwar il-marda tal-Alzheimer b'enfasi fuq id-dijanjosi bikrija, il-prevenzjoni, il-koordinazzjoni bejn ir-riċerki, il-prattiċi tajba u d-drittijiet u d-dinjità tal-pazjenti.
Fi Frar, viċin is-60% tal-Membri tal-Parlament Ewropew iffirmaw id-Dikjarazzjoni Miktuba 80/2008 dwar il-prijoritajiet fil-ġlieda kontra l-marda tal-Alzheimer.
Matul il-presidenza tal-UE, Franza ddedikat żewġ konklużjonijiet tal-Kunsill u konferenza ta’ livell għoli għall-marda tal-Alzheimer, biex jidhru b’mod eżatt l-elementi prinċipali ta’ kooperazzjoni Ewropea aktar mill-viċin fil-qasam tagħna.
Bis-saħħa tal-appoġġ tal-Kummissjoni, Alzheimer Europe setgħet timplimenta l-proġett tagħha “EuroCoDe – Kollaborazzjoni Ewropea dwar id-Dimenzja”, li pprovda ħarsa ġenerali fuq strateġiji differenti fl-Ewropa kollha fir-rigward tad-dijanjosi, il-kura, l-appoġġ soċjali u l-interventi psiko-soċjali u ħarsa ġdida fuq il-prevalenza, l-ispiża u l-prevenzjoni tad-dimenzja.
Alzheimer Europe kienet verament kuntenta b’dan l-impenn importanti mill-istituzzjonijiet kollha tal-UE biex titjieb il-ħajja ta' 7.3 miljun Ewropew li jbatu mill-Alzheimer jew forom oħra ta' dimenzja, u niggarantixxu l-kooperazzjoni sħiħa tagħna f'din l-inizjattiva importanti Ewropea.