Fit-30 ta' Settembru nedejt il-kampanja l-Ewropa għall-Pazjenti. Din il-kampanja tiffoka fuq l-inizjattivi poltiċi differenti li Kummissjoni beħsiebha tadotta dwar is-saħħa fis-6-9 xhur li ġejjin. Dawn l-inizjattivi kollha huma marbuta b'għan komuni – it-titjib tal-kura tas-saħħa fl-Ewropa u b'konsegwenza l-ħajja tal-pazjenti.
Din hija kampanja mmexxija mill-politika li tinkludi għadd differenti ta' proposti politiċi li huma relatati mal-kura tas-saħħa u s-sistemi tas-saħħa: jindirizzaw is-sigurtà tal-pazjenti, mard rari, donazzjoni u trapjant tal-organi, skrining tal-kanċer, il-ħaddiema tas-saħħa, it-tilqim għat-tfal u kontra l-influwenza u l-użu antibijotiku. L-għan ta' din il-kampanja hu li tipprovdi kunċett realistiku u li jinftiehem biex jinġabru dawn l-inizjattivi u jipprovdi punt ta' aċċess sempliċi fl-ambjent tal-politiki u l-azzjonijiet tal-kura tas-saħħa tal-UE li ta' spiss huwa kkunsidrat ikkumplikat.
Hija aġenda ambizzjuża u tipprovdi messaġġ ċar u koerenti dwar il-viżjoni u l-prijoritajiet tagħna fil-kura tas-saħħa. Il-kampanja se tikkontribwixxi lejn il-kisba ta' wieħed mill-valuri promossi fl-istrateġija tal-UE għas-saħħa, dak tal-għoti tas-setgħa liċ-ċittadini. Inħolqot paġna web iddedikata għall-Ewropa għall-Pazjenti fuq
il-portal tas-saħħa tal-UE
. L-għan ta' din il-websajt, disponibbli f'22 lingwa, hu li tiffunzjona bħala għajn ta' tagħrif fejn in-nies jistgħu jpoġġu l-avvenimenti u l-aħbarijiet tagħhom dwar l-inizjattivi tal-Ewropa għall-Pazjenti li jolqtuhom l-aktar mill-viċin.
Irrid inħeġġeġ il-fluss ta' tagħrif f'direzzjonijiet differenti fuq livelli varji u bejn diversi msieħba. Irrid ninvolvi liċ-ċittadini fit-tfassil tal-politika tas-saħħa billi nressaqhom aktar viċin tal-inizjattivi tal-pubbliku; inizjattivi li huma tassew validi għaliex jistgħu jipprovdu opportunijiet lill-pazjenti biex jirċievu kura tas-saħħa sigura u ta' kwalità għolja li jeħtieġu, jistennew u jitolbu. Għalhekk nittama u nistenna li l-kampanja Ewropa għall-Pazjenti tkun suċċess.
Qiegħda norbot fuq l-appoġġ mill-assoċjazzjonijiet tal-pazjenti, il-professjonisti tas-saħħa, ir-rappreżentati nazzjonali u reġjonali, il-membri tal-Parlament Ewropew, l-industrija, l-assiguraturi u bosta organizzazzjonijiet oħra – għaliex aħna lkoll nistgħu nikkontribwixxu għall-istess għan: li ntejbu l-kura tas-saħħa għal kulħadd fl-Ewropa.
