Additional tools

•  
•  

Tiftix Avvanzat

Aġenda soċjali mġedda

Fit-2 ta' Lulju 2008 il-Kummissjoni Ewropea adottat aġenda ambizzjuża mfassla biex tassigura li l-politiki ta' l-Unjoni Ewropea jwieġbu b'mod effettiv għall-isfidi ekonomiċi u soċjali tal-lum.

X'inhi l-kwistjoni?

Il-bidla fit-teknoloġija, il-globalizzazzjoni u popolazzjoni li qed tixjieħ qed ibiddlu s-soċjetajiet ta' l-Ewropa. Il-politiki ta' l-UE jridu jlaħħqu mal-pass ta' dawn ix-xejriet, u jgħinu lin-nies jadattaw ruħhom għal ċirkustanzi li qed jinbidlu. L-aġenda soċjali mġedda għandha l-għan li toħloq iktar opportunitajiet għaċ-ċittadini ta' l-UE, ittejjeb l-aċċess għal servizzi ta' kwalità u turi solidarjetà ma' dawk li l-bidla qed taffettwahom b'mod negattiv.

Kif se tgħin l-aġenda soċjali mġedda?

L-UE għandha poteri u responsabbiltajiet limitati, iżda tista' tagħmel diferenza fil-ħajja tan-nies billi taħdem bi sħab ma' l-Istati Membri u l-partijiet interessati. Tul dawn l-aħħar 50 sena, l-UE mexxiet 'il quddiem b'suċċess l-iżvilupp u l-impjiegi, l-ugwaljanza bejn is-sessi u kundizzjonijiet aħjar tax-xogħol. Hija għenet biex jiġu ttrattati d-diskriminazzjoni, l-faqar u l-inugwaljanzi bejn ir-reġjuni.

Filwaqt li tibni fuq dawn il-kisbiet, l-aġenda soċjali mġedda ġġib flimkien sensiela ta' politiki ta' l-UE biex toffri azzjoni ta' sostenn f'seba' oqsma prioritarji:

• It-tfal u ż-żgħażagħ – l-Ewropa ta' għada
• Investiment fin-nies iktar impjiegi u impjiegi aħjar, ħiliet ġodda
• Il-mobbiltà
• Ħajja itwal u bi tgawdija ta' saħħa aħjar;
• It-taqbida kontra l-faqar u l-esklużjoni soċjali
• Il-ġlieda kontra d-diskriminazzjoni u l-promozzjoni ta' l-ugwaljanza bejn is-sessi
• L-opportunitajiet, l-aċċess u s-solidarjetà fuq livell globali

Kif ser taħdem?

Il-Kummissjoni qed tipproponi li tuża taħlita ta' għodod differenti ta' politika biex tikseb l-għanijiet kif imfassla fl-aġenda soċjali mġedda:

• Leġiżlazzjoni ta' l-UE (eż. proposti biex tiġi ttrattata d-diskriminazzjoni barra s-suq tax-xogħol, id-drittijiet tal-pazjenti fil-kura tas-saħħa transnazzjonali, titjib ta' kif jaħdmu l-Kunsilli Ewropej tax-Xogħol)
• Djalogu Soċjali (ir-rappreżentanti tal-ħaddiema u min iħaddem jiġu nkoraġġiti biex jagħmlu użu sħiħ mill-possibbiltajiet li joffri d-Djalogu Soċjali Ewropew)
• Kooperazzjoni bejn l-Istati Membri (partikolarment kooperazzjoni msaħħa fil-qasam tal-protezzjoni u l-inklużjoni soċjali)
• Fondi mill-UE (l-immobilizzar tal-Fondi Strutturali ta' l-UE, il-Fond Ewropew għall-Aġġustament tal-Globalizzazzjoni u l-Programm PROGRESS għall-impjiegi u s-solidarjetà soċjali)
• Sħubija, djalogu u komunikazzjoni (involviment u konsultazzjoni ma' organizzazzjonijiet non-governattivi, awtoritajiet reġjonali u lokali u partijiet interessati oħra)
• Ikun assigurat li l-politiki kollha ta' l-UE imexxu 'l quddiem l-opportunitajiet, l-aċċess u s-solidarjetà (inizjattivi ġodda jkunu mgħarbula għall-impatti soċjali u l-ħolqien tax-xogħol)

Meta għandha tidħol fis-seħħ?

Il-proċedura u ż-żmien għal kull inizjattiva mressqa fl-aġenda soċjali mġedda huma spjegati fid-dokumenti mehmuża.