Qed noqorbu lejn l-aħħar ġimgħat tas-sajf, u għad hemm bosta festivals xi tgawdi.

Tista' tilħaq l-aħħar ġimgħa tal-festival internazzjonali taż-żfin ta' Vjenna, fejn jieħdu sehem eluf ta' żeffiena u koreografi professjonali minn madwar id-dinja. Il-festival ta' 5 ġimgħat jintemm fit-12 ta' Awwissu.

Mur is-Slovenja, għal taħlita ta’ żfin u teatru fil-festival Mladi Levi li jsir kull sena f'Lubljana (23 ta' Awwissu sat-2 ta' Settembru). Hu magħruf għat-talent żagħżugħ fit-teatru kontemporanju progressiv.

Mit-2 sad-9 ta' Settembru, il-belt ta' Utrecht, fl-Olanda, se tippreżenta Gaudeamus Muziekweek , taħlita internazzjonali ta' kompożituri żgħażagħ u mużika ġdida.

Il-festival internazzjonali tal-letteratura f'Berlin ta' din is-sena (4-15 ta' Settembru) jgħaqqad iktar minn elf awtur mid-dinja kollha għal qari u taħdidiet dwar is-sengħa tagħhom.

Għall-mużika, ta' min jagħti daqqa t'għajn lejn Punkt , li jsir f'Kristiansand, in-Norveġja, bejn is-6 u t-8 ta’ Settembru. Il-leġġenda tal-mużika Brian Eno huwa d-direttur artistiku ta' din is-sena. L-għażliet tiegħu jvarjaw minn mużiċisti tal-avangwardja bħal Cyclobe sa Malian Guimba Kouyaté.

Għal dawk li jivvjaġġaw aktar tard fis-sena, il-festival Steirischer Herbst fl-Awstrija (21 ta' Settembru-14 ta' Ottubru) jippreżenta taħlita affaxxinanti ta' teatru, żfin, arkitettura, films, mużika, arti u letteratura.

Tista' wkoll tmur f'Nitra, is-Slovakja, għall-festival internazzjonali tat-teatru bejn il-21-26 ta' Settembru. Gruppi mir-Repubblika Ċeka, il-Kroazja, l-Ungerija, il-Ġermanja, il-Polonja, ir-Rumanija, ir-Russja, is-Slovenja, ir-Renju Unit u s-Slovakja se jieħdu sehem f'20 prestazzjoni matul 12-il jum dwar it-tema tal-ħtija u l-innoċenza.

Il-bliet kapitali kulturali

Din is-sena l-Bliet Kapitali Ewropej tal-Kultura – Guimarães (il-Portugall) u Maribor (is-Slovenja) – qed itellgħu skeda mimlija avvenimenti b'enfasi fuq ir-rikkezza tal-wirt tagħhom u ta' min jinkludihom fil-btala.

Guimarães qed tenfasizza ċ-ċentru storiku, sit tal-wirt dinji tal-UNESCO, filwaqt li Maribor qed tiffoka fuq in-netwerking mal-bliet fl-inħawi biex tesprimi "l-enerġija tal-arti u l-kultura".

L-appoġġ għall-kultura

Dawn huma biss uħud mill-festivals u l-avvenimenti kulturali madwar l-Ewropa. Ħafna minnhom huma megħjuna finanzjarjament mill-programmi tal-kultura u l-midja tal-UE, li jgħinu fil-promozzjoni tad-djalogu interkulturali u jinkoraġġixxu ċ-ċaqliq ta' artisti u xogħlijiet tal-arti madwar l-Ewropa.

Sib iktar avvenimenti fl-Assoċjazzjoni Ewropea tal-Festivals

Iktar dwar il-programmi tal-kultura u tal-wirt storiku tal-UE