Paraschiva Kovacs iddedikat iktar minn 40 sena minn ħajjitha tiġbor dokumentazzjoni u tippreserva l-bibien tradizzjonali fir-reġjun Odorhei fir-Rumanija.

Xogħolha ġie rikonoxxut mill-UE bil-premju annwali għall-wirt storiku, magħruf ukoll bħala l-premju Europa Nostra , flimkien ma' 27 oħra magħżulin għall-eċċellenza fil-konservazzjoni tal-wirt kulturali.

Kovacs kienet waħda fost is-sitta magħżulin li rċevew il-premjijiet speċjali "Grand Prix" għal kisbiet eċċezzjonali fil-wirt kulturali f'ċerimonja fl-1 ta' Ġunju f'Lisbona.

Meta ngħatat il-premju, il-ġurija ddeskriviet lil Paraschiva Kovacs bħala "eżempju straordinarju" tal-persuni modesti u ddedikati fl-Ewropa kollha li, bla riżorsi, jgħinuna niftħu għajnejna għall-importanza tal-preservazzjoni tal-passat għal dawk li għad iridu jiġu warajna.

Ir-rebbieħa l-oħra tal-Grand Prix 2012 huma:

• il-binja Averof, Ateni, il-Greċja – eżempju importanti tan-neoklassiċiżmu Ewropew. Wara r-restawr il-binja qed tintuża għall-iskola tal-arkitettura li tagħmel parti mill-Università Teknika Nazzjonali
• il-kalkara ta' funderija tat-tip 2, Sagunto, Spanja – il-fdalijiet tal-industrija tal-ħadid u l-azzar fil-baċir tal-Mediterran, ikkonservat bħala sit edukattiv
• Poundstock Gildhouse, Bude, ir-Renju Unit – il-binja mill-bidu tas-seklu 16, qed tintuża għal darb'oħra bħala knisja wara tiswijiet li saru b'mod tradizzjonali
• l-istudju arkeoloġiku tat-tinqix botaniku fuq l-Ara Pacis (l-Altar tal-Paċi), Ruma, l-Italja – il-ġurija rrikonoxxiet il-kwalità tar-riċerka f'dixxiplini differenti u l-pubblikazzjoni li ħarġet minnha
• il-programm edukattiv mill-Fondazzjoni għall Wirt Norveġiż, Vågå, in-Norveġja – l-għalliema u t-tfal tal-iskola ħadmu biex naħdfu żoni żgħar fejn jinsabu għeliem storiċi.

Għall premjijiet ta' din is-sena, in-nies setgħu jivvutaw għal rebbieħ permezz ta' votazzjoni onlajn. L-ewwel għażla tal-pubbliku marret għall-fortifikazzjonijiet ta' Pamplona, Spanja , waħda mill-iktar fortizzi naturali u ċittadelli kkonservati tajjeb fl-Ewropa.

Il-premjijiet huma appoġġati mill-programm kulturali tal-UE, li mill-2007 pprovda €30 miljun biex jikkoofinanzja proġetti ta' wirt kulturali.

L-iskadenza biex tapplika għall-premjijiet tas-sena d-dieħla hi l-1 ta' Ottubru 2012.

Aktar informazzjoni dwar l-appoġġ għall-kultura u l-wirt storiku