Is-Sħubija għall-Innovazzjoni Ewropea hi t-tweġiba tal-Kummissjoni Ewropea għall-isfida li jiġu żviluppati metodi innovattivi li jtejjbu l-kwalità tal-ħajja għall-popolazzjoni li qed tixjieħ, u li jippermettu li l-persuni jibqgħu attivi iktar fit-tul. Għalhekk, l-għan tagħna hu li nużaw kontinwament it-teknoloġija li dejjem tevolvi għall-applikazzjonijiet prattiċi fil-ħajja ta' kuljum. L-għan aħħari tagħna hu li nibnu sett ta' applikazzjonijiet li jservu ta' eżempju.
Is-Sħubija tgħaqqad lill-atturi ewlenin fis-settur tas-saħħa u l-kura, inklużi r-riċerkaturi, in-negozjanti, il-fassala tal-politika, l-organizzazzjonijiet, l-utenti li għandhom l-għarfien u l-istimolu għall-innovazzjoni fit-tliet oqsma ewlenin:
- il-kura
- il-prevenzjoni, l-iskrining u d-dijanjosi bikrija
- il-ħajja u t-tixjiħ indipendenti.
F'dan il-kompitu, li hu innovazzjoni fih innifsu, l-imsieħba involuti qed joffru l-kapaċità tagħhom biex jagħmlu s-Sħubija suċċess. L-iSteering Group, li jiġbor 33 rappreżentant ta' livell għoli, hu l-entità ta' tmexxija tas-Sħubija. Il-grupp hu
ko-presedut mill-Kummissarji għas-Saħħa u l-Politika tal-Konsumatur u l-Kummissarju għall-Aġenda Diġitali.
L-għanijiet prinċipali tas-Sħubija huma li bejn illum u l-2020, il-medja tal-ħajja f'saħħitha tal-Ewropej tiżdied b'sentejn u li jinkisbu tliet rebħiet li jgawdu minnhom l-anzjani, is-sistemi tal-kura soċjali u l-industrija tal-UE permezz ta' swieq u opportunitajiet ġodda ta' negozju.
Fil-Kummissjoni Ewropea għandna fiduċja li fl-2012, li se tkun is-Sena għal Tixjiħ Attiv, se nkunu nistgħu inniedu l-fażi ta' implimentazzjoni tas-Sħubija għall-Innovazzjoni Ewropea dwar it-Tixjiħ Attiv u f'Saħħtu. Se tkun il-bidu ta' era ġdida li nisperaw li ġġib soluzzjonijiet reali, prattiċi u innovattivi biex titjieb il-ħajja taċ-ċittadini tagħna.