Il-mediċina komplementari u alternattiva (CAM) qed issir dejjem iktar popolari fl-Ewropa, b'65% tal-popolazzjoni tirrapporta li qed tuża din il-forma ta' mediċina. Ir-raġunijiet ewlenin mogħtija għall-użu tal-CAM huma l-metodu olistiku tagħha, l-effettività u l-orjentazzjoni lejn il-promozzjoni tas-saħħa minflok il-kontroll tas-sintomi.
It-tobba u l-prattikanti tal-CAM, kull wieħed fil-qasam tiegħu, jirrakkomandaw pakkett individwalizzat ta' kura, inkluża kura waħda jew aktar tal-CAM, u pariri dwar tibdil fl-istil tal-ħajja, dieta, eżerċizzju, tekniki li jnaqqsu l-istress, eċċ. It-terapiji tal-CAM ta' spiss iħarsu lejn is-saħħa u l-mard billi jaħdmu biex jistimolaw u jsaħħu l-proċess istintiv tal-pazjenti li jgħaddilu waħdu. Jintużaw biex jippromwovu u jmantnu s-saħħa u jistgħu jintużaw bħala l-ewwel għażla f'firxa wiesgħa ta' problemi tas-saħħa, partikolarment meta terapiji konvenzjonali ma jeżistux jew m'humiex effettivi, iżda wkoll bħala komplement għall-kura konvenzjonali.
It-terapiji prattikati jinkludu l-akupuntura, il-mediċina antrosopofika, il-mediċina ajurvedika, il-mediċini magħmulin mill-ħxejjex, l-omeopatija, il-mediċina naturopatika, il-mediċina Ċiniża u Tibetana tradizzjonali, ix-shiatsu, il-joga, fost ħafna oħrajn.
EUROCAM, l-alleanza tal-pazjenti, it-tobba u l-prattikanti fil-qasam tal-CAM, hi impenjata biex tqajjem kuxjenza pubblika tal-benefiċċji relatati mas-saħħa tal-CAM, speċjalment f'termini ta' prevenzjoni u promozzjoni tas-saħħa, sikurezza tal-pazjenti, servizzi tas-saħħa mmirati għall-pazjenti, saħħa mentali, kura paljativa, tixjiħ f'saħħtu u ekonomija tas-saħħa.
Bi tweġiba għall-użu dejjem jikber tal-CAM mill-pubbliku Ewropew, id-Direttorat Ġenerali għar-Riċerka tal-Kummissjoni Ewropea ffinanzja CAMbrella, proġett biex jiżviluppa strateġija għar-riċerka futura Ewropea fil-CAM li hi adegwata għall-bżonnijiet tal-kura tas-saħħa tal-Ewropa.